സ്വന്തം ലേഖകന്‍
തിരുവനന്തപുരം: ലൈഫ് പദ്ധതിയുടെ ഫയലുകള്‍ ആവശ്യപ്പെട്ട എന്‍ഫോഴ്‌സ്‌മെന്റ് ഡയരക്ടറേറ്റിനോട് നിയമസഭയുടെ പ്രിവിലേജ് ആന്‍ഡ് എത്തിക്‌സ് കമ്മിറ്റി വിശദീകരണം തേടി. പദ്ധതിയുടെ ഫയലുകള്‍ ആവശ്യപ്പെടുന്നത് സഭയുടെ അവകാശത്തിനു മേലുള്ള കടന്നുകയറ്റമാണെന്ന് ചൂണ്ടിക്കാട്ടിയാണ് ഏഴു ദിവസത്തിനകം വിശദീകരണം നല്‍കാന്‍ ആവശ്യപ്പെട്ട് നോട്ടിസ് നല്‍കിയത്. എന്‍ഫോഴ്‌സ്‌മെന്റ് അസി. കമ്മിഷണര്‍ക്കാണ് നോട്ടിസ് നല്‍കിയത്. ഫയലുകള്‍ ആവശ്യപ്പെട്ടത് പദ്ധതി അട്ടിമറിക്കാനുള്ള ശ്രമമാണെന്നും നിയമസഭാ സെക്രട്ടറി നോട്ടിസില്‍ ആരോപിക്കുന്നു.
ജയിംസ് മാത്യു എം.എല്‍.എയുടെ പരാതിയിലാണ് വിഷയത്തില്‍ വിശദീകരണം തേടാന്‍ എത്തിക്‌സ് കമ്മിറ്റി തീരുമാനിച്ചത്. ഭവനരഹിതരായ മുഴുവന്‍ പേര്‍ക്കും വീട് നല്‍കുമെന്നു സഭയില്‍ മുഖ്യമന്ത്രി പ്രഖ്യാപിച്ചതാണ്. ഇതു തടസപ്പെടുത്തുന്നത് അവകാശലംഘനമാണെന്നും ലൈഫ് പദ്ധതിയിലെ ഇ.ഡി ഇടപെടല്‍ മൂലം പദ്ധതി സ്തംഭനാവസ്ഥയിലാണെന്നും ജയിംസ് മാത്യു നല്‍കിയ പരാതിയില്‍ പറഞ്ഞിരുന്നു.
എന്‍ഫോഴ്‌സ്‌മെന്റ് വിശദീകരണം തൃപ്തികരമല്ലെങ്കില്‍ ഉദ്യോഗസ്ഥരെ സഭയിലേക്കു വിളിച്ചുവരുത്താനാകും. സഭയിലെ വിഡിയോ ദൃശ്യങ്ങള്‍ നല്‍കണമെന്ന നിര്‍ദേശത്തെ തുടര്‍ന്ന് വിവരാവകാശ കമ്മിഷനിലെ ഉദ്യോഗസ്ഥരെ മുന്‍പ് സഭയില്‍ വിളിച്ചുവരുത്തിയിട്ടുണ്ട്. അങ്ങനെ സംഭവിച്ചാല്‍ കേന്ദ്രവും സംസ്ഥാനവും തമ്മിലുള്ള ഏറ്റുമുട്ടലിലേക്കു കാര്യങ്ങളെത്തും.
കള്ളപ്പണത്തട്ടിപ്പ് കേസില്‍ പി.ടി തോമസിനോടും ജ്വല്ലറി തട്ടിപ്പ് കേസില്‍ എം.സി കമറുദ്ദീനോടും വിശദീകരണം തേടാനും തീരുമാനിച്ചു. എ. പ്രദീപ് കുമാര്‍ എം.എല്‍.എയാണ് കമ്മിറ്റി ചെയര്‍മാന്‍.