കാഞ്ഞങ്ങാട്: കേരളത്തില്‍ ഇനിയും രാഷ്ട്രീയ കൊലപാതകങ്ങള്‍ ആവര്‍ത്തിച്ചാല്‍ ഇടപെടേണ്ടി വരുമെന്ന് കേന്ദ്ര ഐ.ടി വകുപ്പ് മന്ത്രി രാജീവ് പ്രതാപ് റൂഡി പറഞ്ഞു. ഇരകളെയാണ് സര്‍ക്കാര്‍ സംരക്ഷിക്കേണ്ടതെന്നും, എന്നാല്‍ കേരളത്തില്‍ വേട്ടക്കാര്‍ക്കൊപ്പമാണ് സര്‍ക്കാര്‍ നിലകൊള്ളുന്നതെന്നും അദ്ദേഹം പറഞ്ഞു. ഇന്നലെ കാഞ്ഞങ്ങാട് മുസ്‌ലിം യതീംഖാനയിലെ ഐ.ടി. ഐ സന്ദര്‍ശിച്ച ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു മന്ത്രി. കേരളത്തില്‍ അടുത്തിടെയായി നാല് കൊലപാതകങ്ങളാണ് ഭരണം നടത്തുന്ന പാര്‍ട്ടിയുടെ നേതൃത്വത്തില്‍ നടന്നത്. ഇത് ഭൂഷണമല്ല, ജനങ്ങളുടെ സംരക്ഷകരാകേണ്ട സര്‍ക്കാര്‍ സംഹാര താണ്ഡവം നടത്തുന്ന കാഴ്ചയാണ് കേരളത്തില്‍ കണ്ടു വരുന്നത്. ഇത്തരം കൊലപാതകങ്ങള്‍ ഇനിയും ആവര്‍ത്തിക്കുകയാണെങ്കില്‍ കേന്ദ്രത്തിന് ഇടപെടേണ്ടി വരുമെന്ന് അദ്ദേഹം മുന്നറിയിപ്പ് നല്‍കി.
പ്രധാന മന്ത്രിയുടെ നിര്‍ദേശ പ്രകാരം കേരളത്തിലെ മികച്ച സാങ്കേതിക വിദ്യാഭ്യാസ സ്ഥാപനങ്ങള്‍ സന്ദര്‍ശിക്കുന്നതിന്റെ ഭാഗമായിട്ടാണ് മന്ത്രി കാഞ്ഞങ്ങാട്ടെ ഓര്‍ഫനേജ് ഐ.ടി.ഐ സന്ദര്‍ശിച്ചത്. സ്ഥാപനത്തിലെ മുഴുവന്‍ ക്ലാസ് മുറികളും മന്ത്രി നോക്കിക്കണ്ടു. സാങ്കേതിക വിദ്യാഭ്യാസ മേഖലയെ ഒരുകുടക്കീഴില്‍ കൊണ്ട് വരുന്ന പദ്ധതിക്കാണ് സര്‍ക്കാര്‍ തുടക്കമിടുന്നത്. പരീക്ഷകള്‍ ഓണ്‍ലൈന്‍ വഴിയാക്കാനുള്ള പദ്ധതിയും ആവിഷ്‌കരിച്ചു വരികയാണ്. മധ്യപ്രദേശില്‍ പരീക്ഷണാടിസ്ഥാനത്തില്‍ നടപ്പിലാക്കിയ പദ്ധതി വിജയകരമാണെന്നും അദ്ദേഹം പറഞ്ഞു.
220 ഓളം വിദ്യാര്‍ഥികള്‍ പഠനം നടത്തി വരുന്ന ഓര്‍ഫനേജ് ഐ.ടി. ഐ പ്രസിഡന്റ് സി.കുഞ്ഞബ്ദുല്ല ഹാജി, സെക്രട്ടറി ബി.എം മുഹമ്മദ് കുഞ്ഞി, ട്രഷറര്‍ മുബാറക് ഹസൈനാര്‍ ഹാജി എന്നിവരുടെ നേതൃത്വത്തില്‍ ഭാരവാഹികള്‍, ഐ.ടി.ഐ ജീവനക്കാര്‍ എന്നിവര്‍ ചേര്‍ന്ന് മന്ത്രിയെ സ്വീകരിച്ചു.
സംസ്ഥാന വ്യവസായ വകുപ്പ് ഡയറക്ടര്‍ സുനില്‍ ജേക്കബ്, മംഗളൂരു എം.പി.നളിന്‍കുമാര്‍ കട്ടീല്‍, ബി.ജെ.പി.ജില്ലാ പ്രസിഡന്റ് അഡ്വ. കെ ശ്രീകാന്ത്,കെ.രഞ്ജിത്ത് എന്നിവര്‍ മന്ത്രിയോടൊപ്പമുണ്ടായിരുന്നു.