മെക്‌സിക്കോ സിറ്റി: മെക്‌സിക്കന്‍ സെക്കന്‍ഡ് ഡിവിഷന്‍ ക്ലബായ ഡൊറാഡോസിന് പുതുജീവന്‍ നല്‍കി മറഡോണ. മറഡോണയുടെ വരവോടെ ക്ലബ് ഗംഭീര വിജയവുമായി സീസണ്‍ ആരംഭിച്ചു.ക്ലബ് പരാജയത്തില്‍ നിന്നു പരാജയത്തിലേക്കു കൂപ്പുകുത്തിയതോടെയാണു കോച്ചിനെ മാറ്റിപ്പരീക്ഷിക്കണമെന്നു അധികൃതര്‍ക്ക് തോന്നിയത്.
മറഡോണ പരിശീലകക്കുപ്പായത്തില്‍ പരാജയമാണെന്നും അതിനാല്‍ അദ്ദേഹത്തെ മാറ്റണമെന്നും ആവശ്യപ്പെട്ടു ഒരുപാടു പേര്‍ രംഗത്തെത്തിയിരുന്നു.
അവര്‍ക്കുള്ള മറുപടി മറഡോണയും ക്ലബും വിജയത്തിലൂടെ ഒരുമിച്ച് നല്‍കി. 4-1 എന്ന സ്‌കോറിനാണു കഫെറ്റലറോസ് ക്ലബിനെ മറഡോണയുടെ ടീമായ ഡൊറാഡോസ് കീഴടക്കിയത്. ടീമിലെ ഇക്വഡോര്‍ താരം വിനിഷ്യോയുടെ ഹാട്രിക്കാണു ടീമിനു മികച്ച വിജയം സമ്മാനിച്ചത്.
ടീമിനൊപ്പമുള്ള ആദ്യ ജയം മറഡോണ ടീമംഗങ്ങളുടെ കൂടെ ആഘോഷിച്ചു. ക്ലബിന്റെ പരിതാപകരമായ അവസ്ഥയില്‍ പ്രതിഷേധിച്ചു ആരാധകര്‍ കളികാണാനെത്തിയിരുന്നില്ല. എന്നാല്‍ മറഡോണയോടൊപ്പമുള്ള ആദ്യ മത്സരത്തില്‍ 10,000 പേര്‍ കളികാണാനെത്തിയിരുന്നു.
ടീം തുടര്‍ന്നും മികച്ച പ്രകടനം പുറത്തെടുത്താല്‍ കൂടുതല്‍ പേര്‍ കളികാണാനെത്തുമെന്നാണു പ്രതീക്ഷയെന്നു ക്ലബ് അധികൃതര്‍ വ്യക്തമാക്കി.