തിരുവനന്തപുരം: സംസ്ഥാനത്തെ സ്‌കൂള്‍ മാന്വല്‍ പരിഷ്‌കരണ കമ്മിറ്റി അനുമതി നല്‍കിയ 18 കായിക ഇനങ്ങള്‍ പ്രളയ പ്രതിസന്ധിയുടെ പേരില്‍ ഉപേക്ഷിച്ചതിനെതിരേ പ്രതിഷേധം ശക്തം. കായിക സംഘടനകളും കായികതാരങ്ങളുമാണ് പ്രതിഷേധവുമായി രംഗത്തെത്തിയത്. 

18 ഗെയിംസ് ഇനങ്ങളിലായി 700ലേറെ കായിക താരങ്ങളുടെ ഭാവിക്ക് വിലങ്ങുതടിയാകുന്ന തീരുമാനത്തില്‍ നിന്ന് സര്‍ക്കാര്‍ പിന്‍മാറണമെന്ന് വിവിധ കായിക സംഘടനകള്‍ ആവശ്യപ്പെട്ടു. ദേശീയ മത്സരങ്ങളില്‍ വര്‍ഷങ്ങളായി സംസ്ഥാനത്തിനുവേണ്ടി മെഡലുകള്‍ നേടിവരുന്ന കായിക ഇനങ്ങളായ ബോക്‌സിങ്, ആര്‍ച്ചറി, ഷൂട്ടിങ്, സൈക്ലിങ്, വുഷു, യോഗ, നെറ്റ് ബാള്‍, സോഫ്റ്റ്ബാള്‍, പവര്‍ലിഫ്റ്റിങ്, ടെനിക്കോയിറ്റ്, റോളര്‍ സ്‌കേറ്റിങ്, ത്രോബോള്‍, ബേസ് ബോള്‍, ടഗ് ഓഫ് വാര്‍, ഫെന്‍സിങ്, കരാട്ടേ, സെപത്രാക്കോ എന്നീ മത്സരങ്ങളാണ് ഉപേക്ഷിക്കാന്‍ തീരുമാനിച്ചത്. മാന്വല്‍ പരിഷ്‌കരണ കമ്മിറ്റിയില്‍ കായിക ഇനങ്ങളില്‍ വിദഗ്ധരല്ലാത്തവര്‍ ചേര്‍ന്നെടുത്ത തീരുമാനത്തിനെതിരേ കായിക അധ്യാപകരുടെ സംഘടനക്കും അസോസിയേഷനുകള്‍ക്കും കടുത്ത എതിര്‍പ്പുണ്ട്. കുട്ടികളുടെ ഭാവിയോര്‍ത്ത് ചെലവുചുരുക്കി ഗെയിംസ് മത്സരങ്ങള്‍ നടത്തുകയോ അല്ലെങ്കില്‍ നടത്തിപ്പിന്റെ ചുമതല അസോസിയേഷനുകളെ ഏല്‍പ്പിക്കുകയോ വേണമെന്നാണ് ഇവരുടെ ആവശ്യം.
മത്സരങ്ങള്‍ നടത്തുന്നതിനുള്ള ഒഫിഷ്യല്‍സുകളുടെ സേവനങ്ങള്‍ (യാത്രാക്കൂലി, ഭക്ഷണം, താമസം) സൗജന്യമായി നല്‍കാമെന്ന് കായിക അസോസിയേഷനുകള്‍ അറിയിച്ചിട്ടും അനുകൂലമായ നടപടി ഉണ്ടായില്ല.
ദേശീയതലത്തില്‍ 85 ഗെയിംസ് ഇനങ്ങളിലാണ് മത്സരങ്ങള്‍ നടത്തുന്നത്. കേരളത്തില്‍ നിന്ന് നിലവില്‍ 21 ഗെയിംസ് ഇനങ്ങളാണ് പങ്കെടുക്കുന്നത്. പുതുതായി ഉള്‍പ്പെടുത്തിയ 18 ഇനങ്ങളെ ഒഴിവാക്കുന്നത് മൂലം മത്സരത്തിനായി തയാറെടുപ്പുകള്‍ നടത്തുന്ന വിദ്യാര്‍ഥികളെ ബാധിക്കുമെന്നും കായിക സംഘടനകള്‍ വ്യക്തമാക്കുന്നു.