അബൂജ: വടക്കുകിഴക്കന്‍ നൈജീരിയയിലുണ്ടായ ചാവേര്‍ ആക്രമണങ്ങളില്‍ 30ല്‍ കൂടുതല്‍ പേര്‍ കൊല്ലപ്പെട്ടു.
മൈദാഗുരിയില്‍ നിന്ന് 25 കി.മീ അകലെയുള്ള കൊണ്ടുഗയില്‍ മൂന്ന് ചാവേര്‍ സ്ഫാടനങ്ങളുണ്ടായെന്നും ഫുട്‌ബോള്‍ കളി കാണുന്നതിനിടെയായിരുന്നു സംഭവമെന്നും നൈജീരിയില്‍ മാധ്യമങ്ങള്‍ റിപ്പോര്‍ട്ട് ചെയ്തു. മരണസംഖ്യ ഉയരാന്‍ സാധ്യതയുണ്ടെന്നും 40 പേര്‍ക്ക് സ്‌ഫോടനത്തില്‍ പരുക്കേറ്റെന്നും സ്റ്റേറ്റ് എമര്‍ജന്‍സി മാനേജ്‌മെന്റ് ഏജന്‍സി തലവന്‍ ഉസ്മാന്‍ കാച്ചല്ല പറഞ്ഞു.
ഞാറാഴ്ച രാത്രി ഒന്‍പതോടെ ടിവിയില്‍ ഫുട്‌ബോള്‍ കാണുന്ന ഹാളിന് സമീപത്താണ് സ്‌ഫോടനമുണ്ടായത്. ഹാളിലേക്ക് ചാവേറിനെ പ്രവേശിപ്പിക്കാന്‍ അനുവദിക്കാത്തതിനെ തുടര്‍ന്ന് ഇയാള്‍ പൊട്ടിത്തെറിക്കുകയായിരുന്നു. തുടര്‍ന്ന് സമീപത്തെ ഹോട്ടലില്‍ ഒരുമിച്ചുകൂടിയിരുന്നവര്‍ക്കിടയില്‍ നിന്ന് മറ്റു രണ്ട് ചാവേറുകള്‍ പൊട്ടിത്തെറിച്ചു. കൊല്ലപ്പെട്ടവരില്‍ ഭൂരിഭാഗവും കളി കാണാനെത്തിയവരാണ്. ആക്രമണത്തിന്റെ ഉത്തരവാദിത്തം ആരും ഇതുവരെ ഏറ്റെടുത്തിട്ടില്ല. തീവ്രവാദ സംഘടനയായ ബോകോ ഹറം നൈജീരിയയില്‍ പതിവായി ആക്രമണം നടത്താറുണ്ട്. മോഗുനയില്‍ ഏപ്രിലിലുണ്ടായ ചാവേര്‍ സ്‌ഫോടനത്തില്‍ സൈനികന്‍ ഉള്‍പ്പെടെ രണ്ട് പേര്‍ കൊല്ലപ്പെട്ടിരുന്നു.