ഹോങ്കോങ്: കുറ്റവാളികളെ കൈമാറുന്ന ബില്ലിനെതിരേ ഹോങ്കോങ്ങില്‍ പ്രതിഷേധം തുടരുന്നതിനിടെ ജനാധിപത്യ നേതാവ് ജോഷ്വാ വോങ് ജയില്‍ മോചിതനായി. രണ്ട് മാസത്തെ ജയില്‍ വാസത്തിന് ശേഷമാണ് ഇദ്ദേഹം ജയില്‍ മോചിതനാകുന്നത്. 2014ല്‍ നടന്ന ജനാധിപത്യ മുന്നേറ്റമായ കുട വിപ്ലവത്തിന് നേതൃത്വം നല്‍കിയതിനാലാണ് 22 കാരനായ ജോഷ്വാ വാങ് അറസ്റ്റിലായത്. 79 ദിവസത്തോളം നീണ്ടുനിന്ന കുട വിപ്ലവത്തിന് നേതൃത്വം നല്‍കിയത് ഇദ്ദേഹം ഉള്‍പ്പെടെയുള്ള വിദ്യാര്‍ഥി, ആക്ടിവിസ്റ്റുകളായിരുന്നു.

അതിനിടെ കുറ്റവാളികളെ ചൈനക്ക് കൈമാറുന്ന ബില്ലിനെതിരേ രാജ്യത്ത് നടക്കുന്ന പ്രതിഷേധത്തില്‍ പങ്കെടുക്കുമെന്ന് ജോഷ്വാ വാങ് പറഞ്ഞു. ജയില്‍ മോചിതനായതിന് ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ചീഫ് എകിസ്‌ക്യൂട്ടീവ് കാരി ലാമിന്റെ രാഷ്ട്രീയ പ്രവര്‍ത്തനം അവസാനിപ്പിക്കേണ്ട സമയമാണിത്. ഹോങ്കോങ്ങിലെ ജനങ്ങള്‍ക്കുനേരെ തോക്ക് തിരിക്കാന്‍ അനുമതി നല്‍കിയത് അവരാണ്. രാജ്യത്തിന്റെ നേതാവായി കാരി ലാമിനെ അംഗീകരിക്കുകയെന്നുള്ളത് പ്രയാസമാണ്. ഹോങ്കോങ് പോലെയുള്ള ആഗോള സാമ്പത്തിക കേന്ദ്രങ്ങളില്‍ അവര്‍ ടിയാന്മര്‍ സ്‌ക്വയര്‍ മോഡല്‍ അടിച്ചമര്‍ത്തല്‍ അനുകരിക്കുമെന്ന് അദ്ദേഹം പറഞ്ഞു.

കുറ്റവാളികളെ കൈമാറുന്ന ബില്‍ താല്‍ക്കാലികമായി റദ്ദാക്കി കാരി ലാം രാജ്യത്തോട് മാപ്പ് പറഞ്ഞെങ്കിലും ഹോങ്കോങ്ങില്‍ പ്രതിഷേധം തുടരുകയാണ്. ബില്‍ പൂര്‍ണമായി റദ്ദാക്കണം, കാരി ലാം രാജിവയ്ക്കണം തുടങ്ങിയ ആവശ്യങ്ങളാണ് പ്രതിഷേധക്കാര്‍ ഉന്നയിക്കുന്നത്. സര്‍ക്കാര്‍ ആസ്ഥാനത്തേക്കുള്ള റോഡുകള്‍ ഇന്നലെ പ്രതിഷേധക്കാര്‍ അടച്ചു. വിദ്യാര്‍ഥികള്‍, തൊഴിലാളികള്‍ ഉള്‍പ്പെടെയുള്ളവര്‍ പ്രതിഷേധത്തില്‍ പങ്കെടുത്തു. ഞായറാഴ്ച നടന്ന പ്രതിഷേധത്തില്‍ 20 ലക്ഷത്തോളം പേരാണ് പങ്കെടുത്തത്. ഹോങ്കോങ്ങില്‍ ഏറ്റവും കൂടുതല്‍ പേര്‍ പങ്കെടുത്ത റാലിയായിട്ടാണ് ഇതിനെ കരുതുന്നത്. എന്നാല്‍ ഹോങ്കോങ്ങിലെ പ്രതിഷേധം സംബന്ധിച്ചുള്ള ആശങ്കകള്‍ ചൈനീസ് പ്രസിഡന്റ് ജിന്‍പിങ്ങിന് മുന്നില്‍ യു.എസ് അവതരിപ്പിക്കും. ജപ്പാനില്‍ നടക്കുന്ന ജി20 ഉച്ചകോടിയില്‍ പ്രസിഡന്റ് ട്രംപ് വിഷയം അവതരിപ്പിക്കുമെന്ന് യു.എസ് സ്റ്റേറ്റ് സെക്രട്ടറി മൈക് പോംപിയോ അറിയിച്ചു.