പുതിയതെരു: പുതിയതെരു ദേശീയപാതയില്‍ മിനിലോറിയുടെ പുറകില്‍ ബസിടിച്ച് മൂന്നു പേര്‍ക്ക് പരുക്ക്. ലോറി ഡ്രൈവര്‍ തിരുവട്ടൂര്‍ പാറപ്പുറത്ത് മീത്തലെപുരയില്‍ സത്താര്‍(48)നും രണ്ട് ബസ് യാത്രികര്‍ക്കുമാണ് പരുക്കേറ്റത്. ഇന്നലെ രാവിലെ 10.45ന് നിത്യാനന്ദഭവന്‍ ഇംഗ്ലിഷ് മീഡിയം സ്‌കൂളിനു സമീപം തളിപ്പറമ്പില്‍ നിന്നു ചരക്കു കയറ്റി കോഴിക്കോടേക്ക് പോകുകയായിരുന്ന ലോറിയുടെ പുറകില്‍  പയ്യന്നൂരില്‍ നിന്നു കണ്ണൂരിലേക്ക് വരികയായിരുന്ന സ്വകാര്യ ബസ് ഇടിക്കുകയായിരുന്നു. ലോറി തലകീഴായി മറിഞ്ഞു. നാട്ടുകാരുടെ അവസരോചിതമായ ഇടപെടലാണ് സത്താറിന്റെ ജീവന്‍ രക്ഷിച്ചത്. സത്താറിനെ ഉടന്‍ തന്നെ കണ്ണൂര്‍ എ.കെ.ജി ആശുപത്രിയില്‍ പ്രവേശിപ്പിച്ചു. സ്‌കൂളിലേക്ക് വിദ്യാര്‍ഥികള്‍ നടന്നു പോകുന്ന വഴിയിലാണ് ലോറി മറിഞ്ഞത്. സ്‌കൂളിലേക്കുള്ള വാഹനങ്ങള്‍ നിര്‍ത്തിയിടുന്നതും ഇവിടെയാണ്.
അപകടത്തെ തുടര്‍ന്ന് രോഷാകുലരായ നാട്ടുകാര്‍ ബസിന്റെ ചില്ലുകള്‍ അടിച്ചുതകര്‍ത്തു. വളപട്ടണം എസ്.ഐ ശ്രീജിത്ത് കൊടേരിയും സംഘവും എത്തിയാണ് നാട്ടുകാരെ പിന്തിരിപ്പിച്ചത്. കണ്ണൂരില്‍ നിന്ന് ഫയര്‍ഫോഴ്‌സ് എത്തി രക്ഷാപ്രവര്‍ത്തനം നടത്തി. വളപട്ടണം ഖലാസികള്‍ എത്തിയാണ് അപകടത്തില്‍പ്പെട്ട ലോറി എടുത്തുമാറ്റിയത്.