മിനാസ് ജെറൈസ്: ഇക്വഡോറിന്റെ പ്രതിരോധപ്പൂട്ട് പൊളിച്ചടുക്കി ഉറുഗ്വെ കോപ അമേരിക്കയില്‍ വരവറിയിച്ചു. ആദ്യ മത്സരത്തില്‍ എതിരില്ലാത്ത നാല് ഗോളുകള്‍ക്കാണ് ഉറുഗ്വെ ഇക്വഡോറിനെ പരാജയപ്പെടുത്തിയത്. ഉറുഗ്വെക്ക് വേണ്ടി സൂപ്പര്‍ താരങ്ങളായ ലൂയിസ് സുവാരസ്, എഡിസന്‍ കവാനി, നിക്കോളാസ് ലൊഡൈറോ എന്നിവര്‍ ഗോള്‍ നേടി. മറ്റൊരു ഗോള്‍ ഇക്വഡോര്‍ താരം അര്‍ദുറോ മിനയുടെ വകയായിരുന്നു.

ഗ്രൂപ്പ് ബിയിലെ മറ്റൊരു മത്സരത്തില്‍ അതിഥികളായെത്തിയ ഖത്തര്‍ പരാഗ്വെയെ സമനിലയില്‍ തളച്ചു. രണ്ട് ഗോളുകള്‍ക്ക് പിറകില്‍ നിന്ന ശേഷമാണ് ഖത്തര്‍ സമനില പിടിച്ചത്.
ഗ്രൂപ്പ് സിയില്‍ നടന്ന മത്സരത്തില്‍ മികച്ച പ്രകടനമാണ് ഉറുഗ്വെ പുറത്തെടുത്തത്. പ്രതിരോധത്തില്‍ ബസ് പാര്‍ക്കിങ് പോലെ നിലയുറപ്പിച്ച ഇക്വഡോറിനെ അവര്‍ അനായാസം മറികടന്നു. ആറാം മിനുട്ടില്‍ നിക്കോളാസ് ലൊഡൈറോയാണ് ഗോള്‍വേട്ടക്ക് തുടക്കമിട്ടത്. 24ാം മിനുട്ടില്‍ ഇക്വഡോര്‍ താരം ജോസ് ക്വിന്റീറോസ് ചുവപ്പ് കാര്‍ഡ് കണ്ട് പുറത്തുപോയതും ഉറുഗ്വെക്ക് ഗുണകരമായി. ഇക്വഡോര്‍ ബോക്‌സിലേക്ക് നിരന്തരം മുന്നേറ്റങ്ങള്‍ നടത്തിയ ഉറുഗ്വെ 33ാം മിനുട്ടില്‍ എഡിസന്‍ കവാനിയുടെ ബൈസിക്കിള്‍ കിക്കിലൂടെ ഗോള്‍ ലീഡ് ഉയര്‍ത്തി. ക്യാപ്റ്റന്‍ ഗോഡിന്റെ അസിസ്റ്റില്‍ നിന്നായിരുന്നു കവാനിയുടെ ഗോള്‍. 44ാം മിനുട്ടില്‍ ലൂയിസ് സുവാരസും ഗോള്‍ നേടിയതോടെ ഉറുഗ്വെ വിജയമുറപ്പിച്ചു. രണ്ടാം പകുതിയില്‍ അര്‍ദുറോ മിനയുടെ (78ാം മിനുട്ട്) സെല്‍ഫ് ഗോളും ഇക്വഡോര്‍ വലയിലെത്തി.

ഗ്രൂപ്പ് ബി യിലെ മത്സരത്തില്‍ രണ്ട് ഗോളിന് പിന്നില്‍ നിന്നശേഷമായിരുന്നു ഖത്തര്‍ ഗംഭീരമായി തിരിച്ചുവന്നത്. മത്സരം തുടങ്ങി നാലാം മിനുട്ടില്‍ തന്നെ പരാഗ്വെ കളിയില്‍ മുന്നിലെത്തിയിരുന്നു. പെനാല്‍റ്റിയിലൂടെ ഒസ്‌കാര്‍ കാര്‍ഡോസോ ആണ് ഗോള്‍ നേടിയത്. 56ാം മിനുട്ടില്‍ ഡെര്‍ലിസ് ഗോണ്‍സാലസ് നേടിയ ഗോളിലൂടെ പരാഗ്വെ ലീഡ് ഉയര്‍ത്തി.
എന്നാല്‍, 68ാം മിനുട്ടില്‍ അല്‍മോസ് അലിയിലൂടെ ഖത്തര്‍ ഒരു ഗോള്‍ തിരിച്ചടിച്ചു. ബോക്‌സിന് പുറത്ത് നിന്ന് കര്‍വിങ് കിക്കിലൂടെയാണ് അല്‍മോസ് ഗോള്‍ നേടിയത്. രണ്ടാം ഗോളിനായി സമ്മര്‍ദം തുടരവേ 77ാം മിനുട്ടില്‍ യുവാന്‍ റോഡ്രിഗോ റോജാസിന്റെ സെല്‍ഫ് ഗോള്‍ ഖത്തറിന് സമനില സമ്മാനിക്കുകയും ചെയ്തു. ഖത്തര്‍ മുന്നേറ്റ താരം ബൗലം ഖൗഖിയുടെ ഗോള്‍ശ്രമം ഹെഡ് ചെയ്ത് പുറത്തേക്കാക്കുന്നതിനിടെ പന്ത് വലയില്‍ കയറുകയായിരുന്നു.