ബംഗളൂരു: എ.ടി.കെ താരം യുജിന്‍സണ്‍ ലിങ്‌ദോഹ് വീണ്ടും ബംഗളൂരു എഫ്.സിയിലേക്ക്. ഒരു വര്‍ഷത്തെ കരാറിലാണ് ലിങ്‌ദോഹ് വീണ്ടും പഴയ തട്ടകത്തിലേക്ക് തിരിച്ചെത്തുന്നത്.
കഴിഞ്ഞ രണ്ട് വര്‍ഷങ്ങളിലായി എ.ടി.കെക്ക് വേണ്ടിയായിരുന്നു താരം കളിച്ചിരുന്നത്. മുന്‍പ് ബംഗളൂരു എഫ്.സിയില്‍ മികച്ച പ്രകടനം നടത്തിയ ലിങ്‌ദോക്ക് പക്ഷേ എ.ടി.കെയില്‍ മികച്ച പ്രകടനം പുറത്തെടുക്കാന്‍ കഴിഞ്ഞില്ല. രണ്ടു സീസണുകളിലുമായി എട്ട് മത്സരങ്ങള്‍ മാത്രം കളിച്ച ലിങ്‌ദോഹ് അവര്‍ക്ക് വേണ്ടി ഒരു ഗോളോ അസ്സിസ്റ്റോ നേടിയിരുന്നില്ല. 2015-16 സീസണില്‍ ബംഗളൂരു ഐ ലീഗ് കിരീടം നേടിയപ്പോഴും 2014-15ലെയും 2016-17ലെ ഫെഡറേഷന്‍ കപ്പ് കിരീടം ബംഗളൂരു നേടിയപ്പോഴും ലിങ്‌ദോഹ് മികച്ച പ്രകടനം പുറത്തെടുത്തിരുന്നു.