പൂച്ചാക്കല്‍: മരം വീണ് വീടിന്റെ മേല്‍ക്കൂര തകര്‍ന്നു.പള്ളിപ്പുറം പഞ്ചായത്ത് പത്താം വാര്‍ഡ് വെളിയില്‍ ചന്ദ്രദാസിന്റെ വീടിന്റെ ഓട് മേഞ്ഞ മേല്‍ക്കൂരയാണ് കഴിഞ്ഞ രാത്രിയില്‍ മരം വീണ് തകര്‍ന്നത്.
ചെങ്ങണ്ട വടക്കുംകര റോഡിന്റെ വശങ്ങളില്‍ നിന്നിരുന്ന കാലപ്പഴക്കം ചെന്ന പുന്ന മരമാണ് ഒടിഞ്ഞുവീണത്. രാത്രി പതിനൊന്ന് മണിയോടെയായിരുന്നു സംഭവം.
മരം വീഴുന്ന ശബ്ദം കേട്ട് വീട്ടിലുണ്ടായിരുന്നവര്‍ പുറത്തേക്ക് ഓടുകയായിരുന്നു.മേല്‍ക്കൂര പൂര്‍ണ്ണമായും തകര്‍ന്നു.പഞ്ചായത്ത്,വില്ലേജ് അധികൃതര്‍ സ്ഥലത്തെത്തി മേല്‍നടപടി സ്വീകരിച്ചു.