ഗസ: ട്രംപിന്റെ പരാജയത്തില്‍ സന്തോഷവും ആശ്വാസവും പ്രകടിപ്പിച്ച് ഫലസ്തീന്‍ ജനത. അതേസമയം ജോ ബൈഡന്റെ വിജയത്തില്‍ അമിത പ്രതീക്ഷയും വെച്ചു പുലര്‍ത്താത്ത പ്രതികരണമാണ് ഫലസ്തീന്‍ നേതാക്കളുടെ ഭാഗത്തു നിന്നുണ്ടായത്. ഫലസ്തീന്‍ പ്രസിഡന്റിന്റെ ഭാഗത്തു നിന്ന് ഔദ്യോഗിക പ്രതികരണവുമുണ്ടായിട്ടില്ല.

'അല്‍ഭുതകരമായ മാറ്റങ്ങളൊന്നും ഞങ്ങള്‍ പ്രതീക്ഷിക്കുന്നില്ല. എങ്കിലും ട്രംപിന്റെതു പോലെ തീര്‍ത്തും വിനാശകരമായ നീക്കങ്ങള്‍ ബൈഡന്റെ ഭാഗത്തു നിന്നുണ്ടാവില്ലെന്നാണ് പ്രതീക്ഷിക്കുന്നത്'-ഫലസ്തീന്‍ ലിബറേഷന്‍ ഓര്‍ഗനൈസേഷന്‍ അംഗവും നേതാവുമായ ഹനാന്‍ അശ്ഹരാവി പ്രതികരിച്ചു.

ലോകത്തിന് വീണ്ടും ശ്വസിക്കാന്‍ കഴിയണമെന്ന് അവര്‍ ട്വീറ്റ് ചെയ്തു. ട്രംപിന്റെ നയങ്ങളെ സൂക്ഷ്മമായി പരിശോധിച്ച് അതിന് പകരം മനുഷത്വവും നിയമപരവുമായ കാര്യങ്ങള്‍ നടപ്പിലാക്കണമെന്നും അവര്‍ ആവശ്യപ്പെട്ടു.