മാനന്തവാടി: കാലവര്‍ഷത്തെ തുടര്‍ന്ന് നിര്‍ത്തിവെച്ചിരുന്ന ചങ്ങാടയാത്ര പാല്‍വെളിച്ചത്ത് പുനരാരംഭിച്ചു.
ഇതോടൊപ്പം ബാംബു കയാക്കിങ്, റാഫ്റ്റിങ് എന്നിവയും ആരംഭിച്ചിട്ടുണ്ട്. എന്നാല്‍ ദ്വീപിലേക്ക് പ്രവേശനം ആരംഭിച്ചിട്ടില്ല. ദ്വീപിലേക്ക് പ്രവേശിപ്പിക്കുന്ന സഞ്ചാരികളുടെ എണ്ണത്തില്‍ കര്‍ശന നിയന്ത്രണം വനം വകുപ്പ് ഏര്‍പ്പെടുത്തിയത് വലിയ വിവാദങ്ങള്‍ സൃഷ്ടിക്കുകയും നിരവധി പ്രക്ഷോഭങ്ങള്‍ നടക്കുകയും ചെയ്തിരുന്നു. ഇതിനെ തുടര്‍ന്ന് നിയന്ത്രണത്തില്‍ വനം വകുപ്പ് ചെറിയ ഇളവ് വരുത്തിയിരുന്നുവെങ്കിലും അന്യസംസ്ഥാനങ്ങളില്‍ നിന്നുള്‍പ്പെടെ നിത്യേന നിരവധി വിനോദസഞ്ചാരികള്‍ ദ്വീപ് സന്ദര്‍ശിക്കാനാകാതെ നിരാശയൊടെ മടങ്ങിയിരുന്നു.
ഈ സാഹചര്യത്തിലാണ് ജില്ലാ ടൂറിസം പ്രമോഷന്‍ കൗണ്‍സില്‍ മുന്‍ കൈയെടുത്ത് ദ്വീപിന്റെ സൗന്ദര്യം പുറമെ നിന്നെങ്കിലും അനുഭവഭേദ്യമാക്കുക എന്ന ലക്ഷ്യത്തോടെ ചങ്ങാട യാത്ര ആരംഭിച്ചത്. ഈ അവസരം സഞ്ചാരികള്‍ക്ക് ഏറെ പ്രയോജനകരമായി മാറിയിരുന്നു. യാത്ര ആരംഭിച്ച മെയ് മാസത്തില്‍ മാത്രം ഡി.ടി.പി.സിക്ക് 3,12,250 രൂപയും ജൂണ്‍ പകുതി വരെ 14,890 രൂപയും ലഭിച്ചിരുന്നു. കാലവര്‍ഷത്തെ തുടര്‍ന്ന് നിര്‍ത്തിവെച്ച ചങ്ങാട യാത്രയാണ് ഇപ്പോള്‍ പുനരാരംഭിച്ചിരിക്കുന്നത്. അഞ്ച് പേര്‍ക്ക് സഞ്ചരിക്കാവുന്ന രണ്ട് ചെറുചങ്ങാടങ്ങളും 50 പേര്‍ക്ക് യാത്ര ചെയ്യാന്‍ കഴിയുന്ന വലിയ ചങ്ങാടകളുമാണ് ഇപ്പോള്‍ സജീകരിച്ചിരിക്കുന്നത്.
കൂടാതെ സ്വന്തമായി നടത്താന്‍ കഴിയുന്ന ബാംബു കയാക്കിങും റാഫ്റ്റിങും ഒരുക്കിയിട്ടുണ്ട്. ചങ്ങാട യാത്രയുടെ ഉദ്ഘാടനം ഈമാസം 22ന് ഒ.ആര്‍ കേളു എം.എല്‍.എ നിര്‍വഹിക്കും.