മട്ടന്നൂര്‍: ഏളന്നൂരില്‍ സമസ്ത പ്രവര്‍ത്തകനെ സംഘം ചേര്‍ന്ന് മര്‍ദിച്ചതായി പരാതി. മര്‍ദനത്തില്‍ പ്രദേശവാസിയായ മുസ്തഫയ്ക്കാണു (55) പരുക്കേറ്റത്.
ഇദ്ദേഹത്തെ തലശ്ശേരി ഇന്ദിരാഗാന്ധി ആശുപത്രിയില്‍ പ്രവേശിച്ചു. തിങ്കളാഴ്ച രാത്രി പത്തോടെയായിരുന്നു സംഭവം. പള്ളിയില്‍ നിന്നു വരികവെ യാതൊരു പ്രകോപനവുമില്ലാതെ കാന്തപുരം സുന്നി വിഭാഗം പ്രവര്‍ത്തകരായ മുഹ്‌സിന്‍, ഹസന്‍, സിറാജലി എന്നിവരുടെ നേതൃത്വത്തില്‍ ആക്രമിക്കുകയായിരുന്നുവെന്നാണു പരാതി. മുസ്തഫയെ എസ്.വൈ.എസ് ജില്ലാ ജനറല്‍സെക്രട്ടറി ഇബ്രാഹിം ബാഖവി പൊന്ന്യം സന്ദര്‍ശിച്ചു.
സുന്നികള്‍ ഐക്യപ്പെടുകയാണെന്നും മഹല്ലുകളില്‍ തര്‍ക്കങ്ങളില്‍ നിന്നുവിട്ടു നില്‍ക്കണമെന്നും നേതാക്കള്‍ പ്രസ്താവനയിറക്കിയതിനു പിന്നാലെ ആക്രമണം അഴിച്ചുവിട്ടത് അപലപനീയമാണെന്ന് അദ്ദേഹം പറഞ്ഞു.