കൊച്ചി: സര്‍വകലാശാലകള്‍ സര്‍ക്കാരിനു കീഴിലുള്ള സ്ഥാപനങ്ങളല്ലെന്നും സ്വതന്ത്രമായി പ്രവര്‍ത്തിക്കാന്‍ ഇവയ്ക്ക് അധികാരമുണ്ടെന്നും ഹൈക്കോടതി വ്യക്തമാക്കി.
അഫിലിയേഷന് സര്‍ക്കാരിന്റെ മുന്‍കൂര്‍ അനുമതി വാങ്ങണമെന്ന് ആരോഗ്യ സര്‍വകലശാലയുടെ ചട്ടങ്ങളിലോ അബ്ദുള്‍ കലാം സാങ്കേതിക സര്‍വകലാശാലയുടെ നിയമത്തിലോ പറഞ്ഞിട്ടില്ലെന്നു കോടതി പറഞ്ഞു. സര്‍വകലാശാലകള്‍ സര്‍ക്കാരിന്റെ ആജ്ഞാനുവര്‍ത്തികളായല്ല പ്രവര്‍ത്തിക്കേണ്ടത്, ചട്ടങ്ങള്‍ അനുസരിച്ച് സ്വതന്ത്രമായി പ്രവര്‍ത്തിക്കണം. എന്നാല്‍, മതിയായ ചട്ടങ്ങളും നിയമങ്ങളുമുണ്ടായിട്ടും സര്‍ക്കാരിന്റെ ആജ്ഞയ്ക്കനുസരിച്ചാണ് പ്രവര്‍ത്തിക്കേണ്ടതെന്ന ചിന്തയിലാണ് സര്‍വകലാശാലകളെന്നു കോടതി കുറ്റപ്പെടുത്തി.
എന്തടിസ്ഥാനത്തിലാണ് സര്‍വകലാശാല ഇങ്ങനെ ചിന്തിക്കുന്നതെന്നു മനസിലാകുന്നില്ല. സര്‍ക്കാരിന്റെ ഭരണ നിയന്ത്രണത്തിലാണ് സര്‍വകലാശാലകള്‍ പ്രവര്‍ത്തിക്കുന്നതെന്ന ധാരണയിലാണ് ഇത്തരത്തില്‍ പലപ്പോഴും എന്‍.ഒ.സി ആവശ്യപ്പെടുന്നത്.
സര്‍വകലാശാലകള്‍ സര്‍ക്കാരിനു കീഴിലുള്ള സ്ഥാപനമല്ലെന്നും ഇവയ്ക്ക് സ്വതന്ത്രമായി പ്രവര്‍ത്തിക്കാനാവുമെന്നും പറഞ്ഞുകൊടുക്കേണ്ട സമയമായി. എന്നാല്‍, ഒരു കാര്യത്തിലും സര്‍വകലാശാലകള്‍ സര്‍ക്കാരിന്റെ നിലപാടുകള്‍ തേടരുതെന്നല്ല ഇതിനര്‍ഥമെന്നും ഉത്തരവില്‍ പറയുന്നു. ചട്ടമനുസരിച്ചുള്ള ആധികാരിക നടപടികള്‍ സ്വീകരിക്കുന്നതിന് മുന്‍പ് ഈ വിഷയത്തില്‍ സര്‍ക്കാരിന്റെ മുന്‍കൂര്‍ അനുമതി തേടാന്‍ ബാധ്യതയുണ്ടെന്ന് സര്‍വകലാശാല ചിന്തിക്കരുത്. അഫിലിയേഷന്‍ തേടിയുള്ള സ്വാശ്രയ കോളജുകളുടെ അപേക്ഷയില്‍ സര്‍ക്കാരിന്റെ മുന്‍കൂര്‍ അനുമതി വേണമെന്ന് നിര്‍ദേശിക്കാനുള്ള ബാധ്യത സര്‍വകലാശാലയ്ക്കില്ല. മുന്‍കൂര്‍ അനുമതി വേണമെന്ന സര്‍വകലാശാലയുടെ നിര്‍ദേശം അനാവശ്യവും യുക്തിക്ക് നിരക്കാത്തതുമാണ്.
തൃശൂരിലെ തലക്കോട്ടുകര വിദ്യ ഇന്റര്‍നാഷനല്‍ ചാരിറ്റബിള്‍ ട്രസ്റ്റ് ഉള്‍പ്പെടെയുള്ളവര്‍ നല്‍കിയ ഹരജികളിലാണ് ഹൈക്കോടതിയുടെ നിരീക്ഷണം.