കാക്കനാട്: ഒട്ടോറിക്ഷാ ഡ്രൈവര്‍മാരുടെ മോശം പെരുമാറ്റവും, അമിത ചാര്‍ജ്ജ് ഈടാക്കുന്നുവെന്ന നിരവധി പരാതിയെ തുടര്‍ന്നും ജില്ലാ കലക്ടറുടെ നേതൃത്വത്തില്‍ നഗരത്തില്‍ മോട്ടോര്‍ വാഹന വകുപ്പ് വ്യാപക പരിശോധന നടത്തി.
എറണാകുളം നഗരത്തില്‍ പത്ത് സ്‌ക്വാഡുകളായി തിരിച്ച് കഴിഞ്ഞ ദിവസം വൈകിട്ട് 6 മുതല്‍ രാത്രി 12മണി വരെയായിരുന്നു പരിശോധന നടത്തിയത്. ഫെയര്‍ മീറ്റര്‍ ഇടാതെ ഓടിയ 67 വാഹനങ്ങള്‍ക്കെതിരെയും, ലൈസന്‍സ് ഇല്ലാത്ത 36 ഡ്രൈവര്‍മാര്‍ക്കെതിരെയും കേസ് രജിസ്റ്റര്‍ ചെയ്തു. കൂടാതെ ടാക്‌സ് അടക്കാത്ത 24 വാഹനങ്ങള്‍ കസ്റ്റഡിയില്‍ എടുത്തു.
അനധികൃത ലൈറ്റുകള്‍ ഘടിപ്പിച്ചതും, ലൈസന്‍സില്‍ മാറ്റം വരുത്തിയതുമായ 68 ഓളം വാഹനങ്ങള്‍ക്കെതിരെയും,ഫിറ്റ്‌നസ് ഇല്ലാത്ത 13 വാഹനങ്ങള്‍ക്കെതിരെയും നടപടി സ്വീകരിച്ചു.ആകെ 275 കേസുകളിലായി 114300 രൂപ പിഴ ഈടാക്കി. കളക്ടര്‍ മുഹമ്മദ് വൈ.സഫീറുള്ളയുടെ നേതൃത്വത്തില്‍ ഡെപ്യൂട്ടി ട്രാന്‍സ്‌പോര്‍ട്ട് കമീഷണര്‍ കെ.ജി സാമുവല്‍, എറണാകുളം ആര്‍.ടി.ഒ പി.എച്ച് സാദിഖലി, എന്‍ഫോഴ്‌സ്‌മെന്റ് റീജണല്‍ ട്രാന്‍സ്‌പോര്‍ട്ട് ഓഫിസര്‍ സുരേഷ് എന്നിവരുടെ നേതൃത്വത്തില്‍ ജില്ലയിലെ നാല്‍പതോളം ഉദ്യോഗസ്ഥര്‍ പരിശോധനയില്‍ പങ്കെടുത്തു.