കാക്കനാട്: ജില്ലയില്‍ വിതരണത്തിനൊരുങ്ങുന്നത് 7,92465 റേഷന്‍ കാര്‍ഡുകള്‍. മുന്‍ഗണനാ വിഭാഗത്തില്‍ 998653 ഉം. മുന്‍ഗണനാ എ.എ.വൈ. വിഭാഗത്തില്‍ 146566 ഉം മുന്‍ഗണനേതര സബ്‌സിഡി വിഭാഗത്തില്‍ 1060727 ഉം മുന്‍ഗണനേതര സബ്‌സിഡി ഇല്ലാത്തവയില്‍ 964880 കാര്‍ഡുകളുമാണ് അന്തിമ പട്ടികപ്രകാരം ജില്ലയിലുള്ളത്.
പുതിയ റേഷന്‍കാര്‍ഡുകളുടെ പ്രിന്റിങ് നടന്നുകൊണ്ടിരിക്കുകയാണ്. പ്രിന്റിങ് പൂര്‍ത്തിയായാല്‍ വിതരണം തുടങ്ങും. പുതിയ കാര്‍ഡുകള്‍ നാലു നിറങ്ങളിലാണ്. നിലവിലുള്ള നീല, പിങ്ക് എന്നിവ കൂടാതെ വെള്ള, മഞ്ഞ നിറങ്ങളിലും കാര്‍ഡുകള്‍ ഇറങ്ങും. മുന്‍ഗണനാ എ.എ.വൈ. പദ്ധതിയില്‍ ഉള്‍പ്പെടുന്നവര്‍ക്ക് മഞ്ഞ, മുന്‍ഗണനാ വിഭാഗത്തിലുള്ളവര്‍ക്ക് പിങ്ക്, മുന്‍ഗണനേതര സബ്‌സിഡി വിഭാഗത്തില്‍ നീല, മുന്‍ഗണനേതര സബ്‌സിഡി ഇല്ലാത്തവര്‍ക്ക് വെള്ള നിറത്തിലുള്ള കാര്‍ഡുകളാണ് ലഭിക്കുക.നാലു വിഭാഗത്തിലും കൂടുതല്‍ കാര്‍ഡുകള്‍ കണയന്നൂര്‍ താലൂക്കിലാണ്. റേഷന്‍ കാര്‍ഡുകള്‍ സംബന്ധിച്ചു പഞ്ചായത്തുകളില്‍ നിന്നുള്ള അന്തിമ പട്ടിക സമര്‍പ്പിച്ചതിനു ശേഷമുള്ള പരാതികളും ആക്ഷേപങ്ങളും കാര്‍ഡ് ലഭിച്ചതിനു ശേഷം പരിഗണിക്കാനാണ് സാധ്യത. പ്രിന്റിങ് നടക്കുന്നതിനാല്‍ സാങ്കേതിക പ്രശ്‌നങ്ങള്‍ മൂലമാണിത്. തെറ്റുകളും പരാതികളും കാര്‍ഡ് ലഭിച്ചതിനുശേഷം പരിഗണിക്കുമെന്ന് അധികൃതര്‍ പറഞ്ഞു.