പുലാമന്തോള്‍: കാലവര്‍ഷക്കെടുതിയോടനുബന്ധിച്ചുണ്ടായ പ്രളയത്തില്‍ ഭൂമി പുഴയെടുത്തെന്ന്. പുലാമന്തോള്‍പഞ്ചായത്തിലെ ചെട്ടിയങ്ങാടി സ്‌കൂള്‍ കടവു മുതല്‍ കൊള്ളിത്തോട് വരെയുള്ള ഒരു കിലോമീറ്ററോളം വരുന്ന കുന്തിപ്പുഴയുടെ ഭാഗങ്ങളാണ് കാലവര്‍ഷക്കെടുതിയില്‍ തകര്‍ന്നത്.
ആലഞ്ചേരി അമ്പലക്കടവ് ഉള്‍പ്പെടെ ശബരിമന സുനില്‍, തോട്ടശ്ശേരി മുഹമ്മദ് കുട്ടി, തോട്ടശ്ശേരി കുഞ്ഞമ്മദ് ഹാജി, കാഞ്ഞിരക്കടവത്ത് കുഞ്ഞിമ്മു, കാഞ്ഞിരക്കടവത്ത് കുഞ്ഞിമാള്‍, എം.സി രായിന്‍കുട്ടി ഹാജി, എം.സി കുഞ്ഞിമുഹമ്മദ്, എം.സി ഹംസ, എം.ബി മുഹമ്മദ്കുട്ടി പള്ളത്ത് എന്നിവരടങ്ങുന്ന പത്തോളം പേരുടെ അധീനതയിലുള്ളതാണ് ഇടിഞ്ഞുതകര്‍ന്നുവീണ ജനവാസ കേന്ദ്രമായ ഭൂപ്രദേശം.
കുന്തിപ്പുഴയോരത്തോട് തൊട്ടുനില്‍ക്കുന്ന ഇവിടെയുള്ള വീടുകളിലും മറ്റും പ്രളയ സമയത്ത് ആറ് അടിയോളം വെള്ളം കയറിയിരുന്നു.
പുഴയുടെ ശക്തമായ ഒഴുക്കും ആഴവുമുള്ള ഈ ഭാഗത്ത് വെള്ളം ശക്തമായി കരയില്‍ വന്നിടിക്കുന്നതാണ് വ്യാപകമായതോതില്‍ ഇടിഞ്ഞു വീഴാന്‍ കാരണമെന്നാണ് പറയുന്നത്.