റിയാദ്: കൊറോണ മാറിയാൽ സി എ എ നടപ്പാക്കുമെന്ന കേന്ദ്ര ആഭ്യന്തര മന്ത്രി അമിത് ഷായുടെ നിലപാട് ഇന്ത്യൻ ജനത ഒറ്റക്കെട്ടായി ചെറുത്തു തോൽപ്പിക്കുമെന്നും അതിൻ്റെ പേരിൽ ഇന്ത്യയിലെ പിന്നോക്ക വിഭാഗത്തെ ഭയപ്പെടുത്തി പിന്തിരിപ്പിക്കാൻ സംഘ് പരിവാർ സർക്കാർ നോക്കേണ്ടെന്നും ഇന്ത്യൻ സോഷ്യൽ ഫോറം അസീർ സെൻട്രൽ കമ്മിറ്റി അഭിപ്രായപ്പെട്ടു.

   കൊറോണ മഹാമാരി മൂലം ജനങ്ങൾ കഷ്ടത അനുഭവിക്കുന്ന സാഹചര്യത്തിൽ രാജ്യത്തെ തെരുവുകൾ വീണ്ടും പ്രക്ഷുബ്ധമാകും. ബിജെപി സർക്കാരിൻ്റെ ദുർഭരണത്തിൽ നിന്നും ജനശ്രദ്ധ തിരിക്കാൻ വേണ്ടിയാണ് അമിത് ഷാ വിവാദം സൃഷ്ടിച്ച സി എ എ യുമായി വീണ്ടും വരുന്നത്. മതത്തിൻറെ പേരിൽ ജനങ്ങളെ അകറ്റിനിർത്താനും തടവിൽ തള്ളാനും ഇടയാക്കുന്ന പൗരത്വ നിയമത്തിനെതിരെ പൊതുസമൂഹം രംഗത്തിറങ്ങണം, രാജ്യത്തെ കർഷകരെയും തൊഴിലാളികളെയും ദുരിതത്തിലാക്കി മുന്നോട്ട് പോവുന്ന കിരാത ഭരണം അവസാനിപ്പിക്കാൻ സമ്പന്ന ന്യൂനപക്ഷത്തിനെതിരെ ദരിദ്ര ഭൂരിപക്ഷം ഒന്നിക്കണമെന്നും സോഷ്യൽ ഫോറം ആവശ്യപ്പെട്ടു.

    സെൻട്രൽ കമ്മിറ്റി പ്രസിഡണ്ട് മുഹമ്മദ് കോയ ചേലേമ്പ്ര അധ്യക്ഷതയിൽ ചേർന്ന യോഗത്തിൽ ജനറൽ സെക്രട്ടറി ഹനീഫ ചാലിപ്പുറം, മുസ്തഫ ആറ്റൂർ, മുഹമ്മദലി കല്ലായി എന്നിവർ സംസാരിച്ചു. ജിസാൻ, നജ്റാൻ, അബഹ, ഖമീസ് മുശൈത്ത്, മഹായിൽ, വാദിദവാസർ എന്നിവിടങ്ങളിൽനിന്നുള്ള ബ്ലോക്ക് ഭാരവാഹികളും പരിപാടിയിൽ സംബന്ധിച്ചു.