മക്ക: ഈ വര്‍ഷത്തെ ഉംറ സീസണ്‍ അവസാനിച്ചതായി ബന്ധപ്പെട്ട വകുപ്പുകള്‍ വ്യക്തമാക്കി. ഹജ്ജിനുള്ള ഒരുക്കങ്ങള്‍ പൂര്‍ത്തീകരിക്കുന്നതിനാണ് ഉംറ വിസ താല്‍കാലികമായി നിര്‍ത്തി വച്ചത്. ഹജ്ജ് സീസണ്‍ കഴിഞ്ഞ ശേഷം ദുല്‍ ഹിജ്ജ 15 (ആഗസ്ത് 16) മുതലായിരിക്കും ഇനി മുതല്‍ ഉംറ അപേക്ഷകള്‍ സ്വീകരിക്കുക. ദേശീയ കമ്മിറ്റി ഫോര്‍ ഹജ്ജ് ആന്റ് ഉംറ സി.ഇ.ഒ മുഹമ്മദ് ബിന്‍ ബാദിയാണ് ഇക്കാര്യം വ്യക്തമാക്കിയത്.

മുന്‍വര്‍ഷങ്ങളെ അപേക്ഷിച്ച് കഴിഞ്ഞ വര്‍ഷം മുതലാണ് ശവ്വാല്‍ അവസാനം വരെ ഉംറ കാലാവധി നീട്ടിയത്. വിഷന്‍ 2030 പദ്ധതിയില്‍ ഉള്‍പ്പെടുത്തി ഹജ്ജ്, ഉംറ മന്ത്രാലയം നടപ്പാക്കുന്ന പദ്ധതിയുടെ ഭാഗമായി ഉംറ വിസ സീസണ്‍ ദീര്‍ഘിപ്പിച്ചതോടെ മുഹറം ഒന്നു മുതല്‍ ശവ്വാല്‍ അവസാനം വരെയാണ് ഇപ്പോള്‍ ഉംറ സീസണ്‍.
ഈ വര്‍ഷം ഇതിനകം 76 ലക്ഷത്തിലധികം ഉംറ വിസകളാണ് നല്‍കിയത്. കഴിഞ്ഞ വര്‍ഷത്തേക്കാള്‍ ആറു ലക്ഷത്തിലധികമാണിത്. വിഷന്‍ 2030 പദ്ധതി പ്രകാരം 3 കോടി തീര്‍ഥാടകരെ പുണ്യ ഭൂമിയിലെത്തിക്കുകയാണ് അധികൃതരുടെ ലക്ഷ്യം. ഇതിന്റെ ഭാഗമായാണ് ഓരോ വര്‍ഷവും തീര്‍ഥാടകരുടെ എണ്ണം ഘട്ടം ഘട്ടമായി ഉയര്‍ത്തുന്നത്.