നെല്ലിയാംപതി: പ്രളയദുരിതത്തില്‍ കഷ്ടപ്പെടുന്ന തോട്ടം തൊഴിലാളികള്‍ക്ക് പുറംലോകവുമായി എളുപ്പത്തില്‍ ബന്ധപ്പെടാവുന്ന സ്വകാര്യ എസ്റ്റേറ്റിലേ ഗേറ്റ് അടച്ചിട്ടു.
ഇതിനാല്‍ മറ്റൊരു സ്വകാര്യ എസ്റ്റേറ്റിലെ 20 ഓളം തൊഴിലാളി കുടുംബങ്ങള്‍ ദുരിതത്തിലായി. ഭൂമി വിണ്ടു കീറുകയും മണ്ണിടിച്ചില്‍ ഉണ്ടാവുകയും ചെയ്ത ബ്രുക് ലാന്‍ഡില്‍ താമസിക്കുന്ന അന്യസംസ്ഥാന തൊഴിലാളികളുള്‍പ്പെടെ ഉള്ളവരാണ് ഗേറ്റ് അടച്ചിട്ടതിനാല്‍ ബുദ്ധിമുട്ടുന്നത്.
രാത്രി വല്ല അത്യാഹിതം ഉണ്ടായാല്‍ രോഗികളെ ആശുപത്രിയിലെത്തിക്കാനും കൈകാട്ടിയിലും മറ്റുംപോയി സാധനങ്ങള്‍ വാങ്ങിച്ചുവരാനും ഇവര്‍ക്ക് ഏക വഴിയാണ്.
മറ്റൊരു വഴിയിലൂടെ ചെന്നാണ് വാഹനങ്ങളില്‍ സാധനങ്ങള്‍ വാങ്ങിക്കൊണ്ടു വന്നിരുന്നത്. ഈവഴി കാലവര്‍ഷക്കെടുതിയില്‍ തകര്‍ന്നിരിക്കുകയാണ്. ഇപ്പോള്‍ സ്വകാര്യ എസ്റ്റേറ്റിനുള്ളിലൂടെയാണ് പോകാന്‍ സൗകര്യമെന്ന് ഇവിടത്തുകാര്‍ പറയുന്നു. ജില്ലാ കലക്ടര്‍ ഇടപെടണമെന്നാവശ്യമാണ് തൊഴിലാളികള്‍ ഉന്നയിക്കുന്നത.്