ഭീഷണിപ്പെടുത്തി പണവും തട്ടി

അഞ്ചല്‍(കൊല്ലം): സ്വകാര്യ സ്‌കൂളിലെ പ്ലസ്ടു വിദ്യാര്‍ഥിനിയെ സഹപാഠിയും അയാളുടെ സഹോദരനും ചേര്‍ന്ന് പീഡിപ്പിച്ചു പണം തട്ടിയെടുത്ത കേസില്‍ രണ്ടുപേര്‍ പിടിയില്‍. അഗസ്ത്യകോട് സ്വദേശികളായ അഫ്‌സര്‍ (18), സഹോദരന്‍ ഇജാസ് (20) എന്നിവരാണ് പിടിയിലായത്.

സംഭവത്തെക്കുറിച്ച് പൊലിസ് പറയുന്നത്: പാലോട് സ്വദേശിനിയായ പെണ്‍കുട്ടി കുളത്തുപ്പുഴയിലുള്ള മുത്തശ്ശിയുടെ വീട്ടില്‍ നിന്നാണ് പഠിക്കാന്‍ പോയിരുന്നത്. ഇക്കഴിഞ്ഞ ഫെബ്രുവരി ആറിന് പ്രതികളിലൊരാളായ അഫ്‌സറിന്റെ പിറന്നാള്‍ ആഘോഷത്തിനായി പെണ്‍കുട്ടിയും മറ്റുചില സഹപാഠികളും അഫ്‌സറിന്റെ വീട്ടിലെത്തിയിരുന്നു. ആഘോഷത്തിനിടെ വസ്ത്രത്തില്‍ പടര്‍ന്ന കളര്‍ കഴുകിക്കളയാന്‍ പോയ പെണ്‍കുട്ടിയെ അഫ്‌സര്‍ പീഡനത്തിനിരയാക്കുകയായിരുന്നു. എന്നാല്‍ സംഭവം നടന്ന് ദിവസങ്ങള്‍ക്ക് ശേഷം അഫ്‌സറിന്റെ മൂത്ത സഹോദരന്‍ ഇജാസ് രാത്രിയില്‍ രഹസ്യമായി കുളത്തുപ്പുഴയിലെ പെണ്‍കുട്ടിയുടെ വീട്ടിലെത്തി അനുജന്‍ പീഡിപ്പിച്ച വിവരം അറിഞ്ഞെന്നും ചില കാര്യങ്ങള്‍ സംസാരിക്കാനുണ്ടെന്നും പെണ്‍കുട്ടിയോട് പറഞ്ഞു. കതകുതുറന്നു അകത്ത് കയറിയ ഇജാസ് ഇവിടെ വച്ച് പെണ്‍കുട്ടിയെ ബലാത്സംഗം ചെയ്തു.
പിന്നീട് ഇരുവരും പീഡിപ്പിച്ച വിവരം പുറത്തു പറയുമെന്ന് ഭീഷണിപ്പെടുത്തി പെണ്‍കുട്ടിയോട് 25,000 രൂപ ആവശ്യപ്പെട്ടു. ഭീഷണി തുടര്‍ന്നതോടെ ബംഗളൂരുവില്‍ ഉള്ള ബന്ധുവഴി പെണ്‍കുട്ടി സുഹൃത്തിന്റെ അക്കൗണ്ടില്‍ 25,000 രൂപ നിക്ഷേപിച്ചു. സുഹൃത്തിന്റെ എ.ടി.എം കാര്‍ഡ് ഇജാസിന് കൈമാറുകയും ചെയ്തു. കാര്‍ഡുമായ പോയ ഇജാസ് 25,000 രൂപക്ക് പുറമേ അക്കൗണ്ടില്‍ ബാലന്‍സ് ഉണ്ടായിരുന്ന മൂവായിരം രൂപകൂടി പിന്‍വലിച്ചു. ദിവസങ്ങള്‍ക്കുള്ളില്‍ വീണ്ടും ഭീഷണിയുമായി എത്തിയ ഇജാസ് ആവശ്യപ്പെട്ടത് ഒന്നര ലക്ഷം രൂപയാണ്. ഇതോടെ എന്ത് ചെയ്യണമെന്നറിയാതെ പെണ്‍കുട്ടി കൈഞരമ്പ് മുറിച്ചു ആത്മഹത്യക്ക് ശ്രമിച്ചു.

പിന്നീടും ഭീഷണി തുടര്‍ന്നതോടെ നാടുവിട്ട പെണ്‍കുട്ടിയെ ബംഗളൂരില്‍ നിന്നും കണ്ടെത്തി തിരികെയെത്തിച്ച പാലോട് പൊലിസ് നടത്തിയ ചോദ്യം ചെയ്യലിലാണ് പീഡന വിവരവും തുടര്‍ന്നുള്ള ഭീഷണിയും പുറത്തായത്. ഇതോടെ കേസ് കുളത്തുപ്പുഴ പൊലിസിന് കൈമാറി. കുളത്തുപ്പുഴ പൊലിസ് രണ്ടുപ്രതികളെയും പോക്‌സോ ചുമത്തി അറസ്റ്റ് ചെയ്തു. ഇരുവരെയും തെളിവെടുപ്പിന് ശേഷം പുനലൂര്‍ കോടതിയില്‍ ഹജാരാക്കി റിമാന്‍ഡ് ചെയ്തു.