കല്‍പ്പറ്റ: ഏറെ നാളത്തെ അസ്വാരസ്യങ്ങള്‍ക്ക് ശേഷം കേരള കോണ്‍ഗ്രസ് (എം) വയനാട് ജില്ലാ ഘടകം പിളര്‍ന്നു. സുല്‍ത്താന്‍ ബത്തേരി നഗരസഭയില്‍ യു.ഡി.എഫ് പാനലില്‍ ജയിച്ചിട്ടും എല്‍.ഡി.എഫിന് പിന്തുണ നല്‍കിയ കാലം തൊട്ട് ജില്ലയിലെ കേരള കോണ്‍ഗ്രസ് എമ്മിനുള്ളില്‍ രണ്ട് അഭിപ്രായക്കാരായിരുന്നു. എന്നാല്‍ പാര്‍ട്ടിക്കുള്ളിലെ പ്രതിഷേധങ്ങള്‍ വലിയ രീതിയില്‍ പുറത്തേക്ക് എത്തിയിരുന്നില്ല. ഈ അസ്വാരസ്യങ്ങള്‍ക്ക് പുറമെയാണ് കെ.എം മാണിയുടെ മരണത്തിന് പിന്നാലെ പാര്‍ട്ടിയുടെ അധികാരം പിടിക്കാന്‍ ജോസ് കെ. മാണി ഒരു ഭാഗത്തും പി.ജെ ജോസഫ് മറുഭാഗത്തും അണിനിരന്നത്. ഇതിന്റെ തുടര്‍ച്ചയായാണ് വയനാട്ടിലും പാര്‍ട്ടിക്കുള്ളിലെ പടലപ്പിണക്കങ്ങള്‍ പുറത്തുവന്നത്.

നിലവില്‍ പ്രസിഡന്റ് സ്ഥാനം കൈയാളുന്ന കെ.ജെ ദേവസ്യയെ സ്ഥാനത്ത് നിന്ന് പുറത്താക്കിയെന്നറിയിച്ച് ജോസഫ് വിഭാഗം നേതാക്കള്‍ ഇന്നലെ കല്‍പ്പറ്റയില്‍ വാര്‍ത്താസമ്മേളനം നടത്തി. തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിന് ശേഷം അധികാരം കൈയാളാന്‍ വേണ്ടി യു.ഡി.എഫിനെ കാലുവാരി എല്‍.ഡി.എഫിനൊപ്പം നിന്ന നിലവിലെ സുല്‍ത്താന്‍ ബത്തേരി നഗരസഭാ ചെയര്‍മാന്‍ ടി.എല്‍ സാബുവിന്റെ പാര്‍ട്ടിവിരുദ്ധ പ്രവര്‍ത്തനത്തിന് ചുക്കാന്‍ പിടിച്ചത് കെ.ജെ ദേവസ്യയാണെന്നും ഇതേ തുടര്‍ന്ന് വയനാട്ടില്‍ ഒരു മുന്നണിയിലും കാലുറപ്പിച്ച് നില്‍ക്കാന്‍ കേരള കോണ്‍ഗ്രസ് എമ്മിനായില്ലെന്നുമാണ് ജോസഫ് വിഭാഗം ആരോപിക്കുന്നത്. അതേസമയം, തന്നെ പുറത്താക്കാന്‍ പി.ജെ ജോസഫിന് പോലും അധികാരമില്ലെന്നും തനിക്കെതിരെ നടക്കുന്നത് വെറും ദുഷ്പ്രചാരണമാണെന്നും ദേവസ്യ പറയുന്നു.