താമരശ്ശേരി: മുസ്‌ലിംലീഗ് സംസ്ഥാന ഉപാധ്യക്ഷനും മുന്‍ എം.എല്‍.എയുമായ സി.മോയിന്‍കുട്ടി (77) അന്തരിച്ചു. അര്‍ബുദത്തെ തുടര്‍ന്ന് കുറച്ചുകാലമായി വിശ്രമ ജീവിതം നയിച്ചുവരികയായിരുന്നു. ഇന്നലെ രാവിലെ 8.30ഓടെ അണ്ടോണ ചേലാംപൊയില്‍ വസതിയില്‍ വച്ചാണ് അന്ത്യം.
മുസ്‌ലിം ലീഗ് ദേശീയ കൗണ്‍സില്‍ അംഗം, താമരശ്ശേരി സി.എച്ച് സെന്റര്‍ പ്രസിഡന്റ്, അണ്ടോണ മഹല്ല് മുതവല്ലി, മഹല്ല് പ്രസിഡന്റ്, കുന്നിക്കല്‍ മഹല്ല് പ്രസിഡന്റ്, പരപ്പന്‍പൊയില്‍ നുസ്‌റത്തുല്‍ മുഹ്താജീന്‍ സംഘം പ്രസിഡന്റ്, ലൗഷോര്‍ ഇന്‍സ്റ്റിറ്റിയൂഷന്‍ ഫോര്‍ മെന്റലി ചലഞ്ച്ഡ് വര്‍കിങ് ചെയര്‍മാന്‍, കാരാടി മഹല്ല് കമ്മിറ്റി രക്ഷാധികാരി, കാരാടി മഹല്ല് കമ്മിറ്റി നേതൃത്വം നല്‍കുന്ന മജ്മഅ് തര്‍ബിയത്തുല്‍ ഇസ്‌ലാം എന്ന സംഘടനയുടെ ചെയര്‍മാന്‍ എന്നീ നിലകളിലും പ്രവര്‍ത്തിച്ചുവരികയായിരുന്നു.
രണ്ടുതവണ താമരശ്ശേരി ഗ്രാമപഞ്ചായത്ത് പ്രസിഡന്റും പ്രഥമ ജില്ലാ കൗണ്‍സില്‍ അംഗവുമായി സേവനമനുഷ്ടിച്ചിട്ടുണ്ട്. കൊടുവള്ളിയില്‍ നിന്ന് ഒരു തവണയും തിരുവമ്പാടിയില്‍ നിന്ന് രണ്ടുതവണയും നിയമസഭയിലേക്ക് തെരഞ്ഞെടുക്കപ്പെട്ടു. മുസ്‌ലിം യൂത്ത് ലീഗ് സംസ്ഥാന പ്രസിഡന്റ്, ജന. സെക്രട്ടറി, മുസ്‌ലിം ലീഗ് കോഴിക്കോട് ജില്ലാ വൈസ് പ്രസിഡന്റ്, ട്രഷറര്‍, മുസ്‌ലിം ലീഗ് കോഴിക്കോട് താലൂക്ക് പ്രസിഡന്റ്, കെ.എസ്.ആര്‍.ടി.സി അഡൈ്വസറി ബോര്‍ഡ് അംഗം, സിഡ്‌കോ മെംബര്‍, വഖ്ഫ് ബോര്‍ഡ് അംഗം തുടങ്ങി നിരവധി സ്ഥാനങ്ങള്‍ വഹിച്ചിട്ടുണ്ട്.
1996ല്‍ കൊടുവള്ളിയില്‍ സി. മുഹ്‌സിനെയും 2006ല്‍ തിരുവമ്പാടിയില്‍ പി. സിറിയക് ജോണിനെയും 2011ല്‍ തിരുവമ്പാടിയില്‍ നിന്ന് ജോര്‍ജ് എം. തോമസിനെയും പരാജയപ്പെടുത്തിയാണ് മൂന്നുപ്രാവശ്യം അദ്ദേഹം നിയമസഭയിലെത്തിയത്.
പരേതരായ പി.സി അഹമ്മദ് കുട്ടി ഹാജിയുടെയും ചെറിയോള്‍ എന്ന കുഞ്ഞു ഉമ്മാച്ചയുടെയും മകനാണ്. ഭാര്യ: ഖദീജ കൊണ്ടോട്ടി. മക്കള്‍: അന്‍സാര്‍ മുഹമ്മദ് (വസ്ത്ര റെഡിമെയ്ഡ്‌സ്), മുബീന, ഹസീന. മരുമക്കള്‍: ആയിഷ (മേപ്പയൂര്‍), മുസ്തഫ (അരീക്കോട്), അലി (നരിക്കുനി). സഹോദരങ്ങള്‍: ഒ. അബ്ദുല്‍ഹമീദ് (റിട്ട. ഡയരക്ടര്‍, ഇ.എസ്.ഐ), പി.സി ഉമ്മര്‍കുട്ടി (ഗ്ലാസ് ഹൗസ്, താമരശ്ശേരി) പി.സി റഷീദ് (ആര്‍ക്കിടെക്ട് കോഴിക്കോട്), ഓടങ്ങല്‍ നാസര്‍ (വേവ്‌സ് ബ്യൂട്ടിപാര്‍ലര്‍), ആയിഷ, റാബിയ, നസീമ.
സമസ്ത കേന്ദ്ര മുശാവറ അംഗം വാവാട് കുഞ്ഞിക്കോയ മുസ്‌ലിയാര്‍, സയ്യിദ് സാദിഖലി ശിഹാബ് തങ്ങള്‍, ഡോ.എ.പി അബ്ദുല്‍ ഹകീം അസ്ഹരി എന്നിവര്‍ കൊവിഡ് പ്രോട്ടോക്കോള്‍ അനുസരിച്ച് വീട്ടില്‍ നടന്ന മയ്യിത്ത് നിസ്‌കാരത്തിന് നേതൃത്വം നല്‍കി. ഉച്ചയ്ക്ക് ഒന്നരയോടെ അണ്ടോണ ജുമാമസ്ജിദില്‍ നടന്ന ജനാസ നിസ്‌കാരത്തിന് പാണക്കാട് മുനവ്വറലി ശിഹാബ് തങ്ങള്‍ നേതൃത്വം നല്‍കി. തുടര്‍ന്ന് ഔദ്യോഗിക ബഹുമതികളോടെയാണ് ഖബറടക്കം നടത്തിയത്.