മക്ക: ഈ വര്‍ഷത്തെ ഉംറ സീസണ്‍ അവസാനിച്ചതായി ബന്ധപ്പെട്ട വകുപ്പുകള്‍ വ്യക്തമാക്കി. ഹജ്ജിനുള്ള ഒരുക്കങ്ങള്‍ പൂര്‍ത്തീകരിക്കുന്നതിനാണ് ഉംറ വിസ താത്കാലികമായി നിര്‍ത്തി വെച്ചത്. ഹജ്ജ് സീസണ്‍ കഴിഞ്ഞ ശേഷം ദുല്‍ ഹിജ്ജ 15 (ആഗസ്ത് 16) മുതലായിരിക്കും ഇനി മുതല്‍ ഉംറ അപേക്ഷകള്‍ സ്വീകരിക്കുക. ദേശീയ കമ്മിറ്റി ഫോര്‍ ഹജ്ജ് ആന്‍ഡ് ഉംറ സി ഇ ഒ മുഹമ്മദ് ബിന്‍ ബാദിയാണു ഇക്കാര്യം വ്യക്തമാക്കിയത്.

മുന്‍വര്‍ഷങ്ങളെ അപേക്ഷിച്ച് കഴിഞ്ഞ വര്‍ഷം മുതലാണ് ശവ്വാല്‍ അവസാനം വരെ ഉംറ കാലാവധി നീട്ടിയത്. വിഷന്‍ 2030 പദ്ധതിയില്‍ ഉള്‍പ്പെടുത്തി ഹജ്, ഉംറ മന്ത്രാലയം നടപ്പാക്കുന്ന പദ്ധതിയുടെ ഭാഗമായി ഉംറ വിസ സീസണ്‍ ദീര്‍ഘിപ്പിച്ചതോടെ മുഹറം ഒന്നു മുതല്‍ ശവ്വാല്‍ അവസാനം വരെയാണ് ഇപ്പോള്‍ ഉംറ സീസണ്‍.

ഈ വര്‍ഷം ഇതിനകം 76 ലക്ഷത്തിലധികം ഉംറ വിസകളാണ് നല്‍കിയത്. കഴിഞ്ഞ വര്‍ഷത്തേക്കാള്‍ ആറു ലക്ഷത്തിലധികമാണിത്. വിഷന്‍ 2030 പദ്ധതി പ്രകാരം 3 കോടി തീര്‍ഥാടകരെ പുണ്യ ഭൂമിയിലെത്തിക്കുകയാണു അധികൃതരുടെ ലക്ഷ്യം. ഇതിന്റെ ഭാഗമായാണ് ഓരോ വര്‍ഷവും തീര്‍ത്ഥാടകരുടെ എണ്ണം ഘട്ടം ഘട്ടമായി ഉയര്‍ത്തുന്നത്. ഈ വര്‍ഷം എത്തിയവരില്‍ 6,550,520 തീര്‍ഥാടകര്‍ വ്യോമ മാര്‍ഗവും 707,955 തീര്‍ഥാടകര്‍ കര മാര്‍ഗ്ഗവും 135,182 തീര്‍ഥാടകര്‍ കര മാര്‍ഗ്ഗവുമാണു പുണ്യ ഭൂമിയിലെത്തിയത്.

ഉംറ വിസ കാലാവധി അവസാനിക്കുന്നതിനു മുമ്പായി തീര്‍ഥാടകരെ സ്വദേശങ്ങളിലേക്ക് തിരിച്ചയക്കുന്നതിന് സര്‍വീസ് കമ്പനികള്‍ക്ക് പ്രത്യേകം നിര്‍ദേശം നല്‍കിയിട്ടുണ്ട്. കാലാവധി കഴിഞ് രാജ്യത്ത് അനധികൃതമായി തങ്ങുന്നവര്‍ക്കെതിരെയും ഇവരെ കൊണ്ടുവന്ന കമ്പനികള്‍ക്കെതിരെയും നടപടികള്‍ സ്വീകരിക്കുമെന്ന് അധികൃതര്‍ നേരത്തെ തന്നെ മുന്നറിയിപ്പ് നല്‍കി തുടങ്ങിയിട്ടുണ്ട്.