നാദാപുരം: തുരുമ്പെടുത്ത് നശിക്കുന്ന വാഹനങ്ങള്‍കൊണ്ട് നിറഞ്ഞിരിക്കുകയാണ് നാദാപുരം മേഖലിയിലെ പൊലിസ് സ്റ്റേഷനുകള്‍. നിയമലംഘനങ്ങള്‍ക്ക് പൊലിസ് പിടികൂടുന്ന വാഹനങ്ങളാണ് സ്റ്റേഷനുകളിലെ കോംപൗണ്ടുകളില്‍ ഉപയോഗശൂന്യമായി കിടക്കുന്നത്.
ആഡംബര കാറുകളടക്കം ആയിരത്തോളം ചെറുതും വലുതുമായ വാഹനങ്ങള്‍ എടച്ചേരി, നാദാപുരം, വളയം, കുറ്റ്യാടി, തൊട്ടില്‍പാലം, കൂരാച്ചുണ്ട് തുടങ്ങിയ നാദാപുരം സബ്ഡിവിഷന് കീഴില്‍ വരുന്ന പൊലിസ് സ്റ്റേഷനുകളില്‍ വെയിലും മഴയുമേറ്റ് ദ്രവിക്കുകയാണ്.
ഇത്തരം വാഹനങ്ങള്‍ നശിക്കുന്നതിന് മുന്‍പ് ഉടമയ്ക്ക് വിട്ടുനല്‍കുകയോ, കോടതിയുടെ അനുമതിയോടെ സര്‍ക്കാര്‍ ഏറ്റടുക്കുകയോ ചെയ്താല്‍ കോടികളുടെ നഷ്ടടം ഒഴിവാക്കാന്‍ കഴിയുമെങ്കിലും ഇത് ആരും ശ്രദ്ധിക്കാറില്ല. നിയമക്കുരുക്കിലകപ്പെട്ട് കെട്ടിക്കിടക്കുന്ന വാഹനങ്ങള്‍ പ്രശ്‌നം പരിഹരിച്ച് ഉടമക്ക് വിട്ടുനല്‍കുകയോ പൊതുലേലത്തിലൂടെ വില്‍പന നടത്തുകയോ ചെയ്യണമെന്ന് കാണിച്ച് എ.ഡി.ജി.പി നേരത്തെ ഉത്തരവ് ഇറക്കിയിരുന്നെങ്കിലും നടപടിക്രമങ്ങള്‍ ഇതുവരെ ഇഴയുകയാണ്.
 മദ്യക്കടത്ത്, ശരിയായ രേഖകളില്ലാത്തവ, അപകടത്തില്‍പ്പെടുന്നവ, മണല്‍കടത്ത് എന്നീ കേസുകളില്‍ പെട്ടാണ് കൂടുതല്‍ വാഹനങ്ങളും പൊലിസ് സ്റ്റേഷനില്‍ പിടിച്ചിട്ടിരിക്കുന്നത്. നാദാപുരം സ്റ്റേഷനില്‍ മാത്രം മണല്‍ കടത്തിയതിന് പിടികൂടിയ മൂന്നു വലിയ ലോറികളും ഒരു മണ്ണുമാന്തി യന്ത്രവും നിരവധി ആഡംബര കാറുകളും ഓട്ടോറിക്ഷകളും നൂറുകണക്കിന് ബൈക്കുകളുമുണ്ട്.
നേരത്തെ ഒരുതവണ വാഹനങ്ങള്‍ ലേലത്തിന് വച്ചിരുന്നുവെങ്കിലും ഉപയോഗിക്കാന്‍ പറ്റാത്ത നിലയില്‍ വാഹനങ്ങള്‍ നശിച്ചതിനാല്‍ ശ്രമം പരാജയപ്പെടുകയായിരുന്നു.
പൊലിസ് പിടികൂടുന്ന വാഹനങ്ങളുടെ കേസുകള്‍ കോടതി തീര്‍പ്പു കല്‍പ്പിക്കുമ്പോഴേക്കും വര്‍ഷങ്ങള്‍ കഴിയും. മണല്‍കടത്ത്, മദ്യക്കടത്ത് പോലുള്ള കേസുകളില്‍ ഉള്‍പ്പെടുന്ന വാഹനങ്ങള്‍ കോടതി വിധി വരുന്നതിന് മുന്‍പ് ഉടമക്ക് വിട്ടുകിട്ടണമെങ്കില്‍ വാഹനത്തിന്റെ മാര്‍ക്കറ്റ് വിലക്കുള്ള ബോണ്ട് കോടതിയില്‍ കെട്ടിവയ്ക്കണം. ഇതേതുടര്‍ന്ന് പല ഉടമകളും വാഹനം ഉപേക്ഷിക്കുകയാണ് ചെയ്യുന്നത്.
ഇത്തരം വാഹനങ്ങള്‍ സ്റ്റേഷന്‍ പരിസരങ്ങളില്‍ തന്നെ സൂക്ഷിക്കേണ്ട അവസ്ഥയാണുള്ളത്. പൊലിസ് പിടികൂടുന്ന ഇത്തരം വാഹനങ്ങള്‍ വെയിലും മഴയുമേല്‍ക്കാതെ സൂക്ഷിക്കാനുള്ള സൗകര്യങ്ങള്‍ മിക്ക സ്റ്റേഷനകളിലുമില്ല. പല സ്റ്റേഷനുകളിലും വാഹനങ്ങള്‍ സൂക്ഷിക്കാന്‍ സൗകര്യങ്ങളില്ലാത്തതിനാല്‍ റോഡിന്റെ വശങ്ങളിലാണ് നിര്‍ത്തിയിടുന്നത്.
പാതയോരത്ത് നിര്‍ത്തിയിടുന്ന വാഹനങ്ങള്‍ ഗതാഗതക്കുരുക്കുണ്ടാകുന്നതോടൊപ്പം കാല്‍നടക്കാര്‍ക്കും മറ്റു വാഹനങ്ങള്‍ക്കും ഭീഷണിയാണ്.