ലണ്ടന്‍: വടക്കന്‍ ലണ്ടനില്‍ പള്ളിക്ക് സമീപത്ത് ആള്‍ക്കൂട്ടത്തിനിടയിലേക്ക് കാര്‍ ഇടിച്ചുകയറ്റിയതിനെ തുടര്‍ന്ന് മൂന്ന് പേര്‍ക്ക് പരുക്ക്. സെര്‍ക്കില്‍വുഡ് നഗരത്തില്‍ ഇന്നലെ ഉച്ചക്കായിരുന്ന സംഭവം.
രണ്ട് യുവതികള്‍ക്കും 50 കാരനുമാണ് പരുക്കേറ്റത്. സ്വകാര്യ കാര്‍ പാര്‍ക്കിങ് കേന്ദ്രത്തില്‍നിന്ന് വാഹനം മാറ്റാന്‍ ആവശ്യപ്പെട്ടതിനെ തുടര്‍ന്ന് കാര്‍ ഡ്രൈവറും സമീപത്തെ മജ്‌ലിസ് അല്‍ ഹുസൈന്‍ ഇസ്‌ലാമിക് സെന്ററിലെ സെക്യൂരിറ്റി ഉദ്യോഗസ്ഥനും തമ്മില്‍ വാക്ക് തര്‍ക്കത്തില്‍ ഏര്‍പ്പെടുകയായിരുന്നു. ഇസ്‌ലാം വിരുദ്ധ പരാമര്‍ശം നടത്തിയ കാര്‍ ഡ്രൈവര്‍ സമീപത്തുള്ള കാല്‍നടയാത്രക്കാരിലേക്ക് ഇടിച്ചുകയറ്റുകയായിരുന്നു. സംഭവത്തില്‍ അന്വേഷണം ആരംഭിച്ചുവെന്നും തീവ്രവാദി ബന്ധമില്ലെന്നും പൊലിസ് പറഞ്ഞു.