കണ്ണൂര്‍: എം.എസ്.എഫ് സംസ്ഥാന സമ്മേളനത്തിനു നാളെ കണ്ണൂരില്‍ കൊടി ഉയരും. കണ്ണൂര്‍ പൊലിസ് മൈതാനിയില്‍ പ്രത്യേകം സജ്ജമാക്കിയ ഹബീബ് സ്‌ക്വയറിലാണു സമ്മേളനം. മുസ്‌ലിംലീഗ് രൂപീകരണാനന്തരം ആദ്യസമ്മേളനം നടത്തിയ പാലക്കാട് പുതുനഗരത്ത് നിന്നാരംഭിച്ച പതാകജാഥയും മഞ്ചേശ്വരത്ത് നിന്നാരംഭിച്ച കൊടിമര ജാഥയും നാളെ വൈകുന്നേരം അഞ്ചിന് കണ്ണൂരിലെത്തുമെന്നു സംസ്ഥാന പ്രസിഡന്റ് ടി.പി അഷ്‌റഫലി വാര്‍ത്താസമ്മേളനത്തില്‍ അറിയിച്ചു. തുടര്‍ന്നു ഗാന്ധി സ്‌ക്വയറില്‍ നിന്നു പ്രകടനമായി സമ്മേളനനഗരിയായ ഹബീബ് സ്‌ക്വയറിലേക്ക് ആനയിക്കും.

സംസ്ഥാന പ്രസിഡന്റ് ടി.പി.അഷ്‌റഫലി പതാക ഉയര്‍ത്തുന്നതോടെ സമ്മേളനത്തിനു തുടക്കമാകും. 30നു രാവിലെ ഒന്‍പതിന് പ്രതിനിധി സമ്മേളനം മുസ്‌ലിംലീഗ് ദേശീയ പ്രസിഡന്റ് ഇ. അഹമ്മദ് എം.പി ഉദ്ഘാടനം ചെയ്യും. 9262 പ്രതിനിധികള്‍ പങ്കെടുക്കും. വിവിധ സെഷനുകളിലായി രാഷ്ട്രീയ സാമൂഹിക സാംസ്‌കാരിക വിദ്യാഭ്യാസ മേഖലയിലെ പ്രമുഖര്‍ സംബന്ധിക്കും. രാത്രി ഏഴിന് പൊതുസമ്മേളനം മുസ്‌ലിംലീഗ് സംസ്ഥാന പ്രസിഡന്റ് പാണക്കാട് ഹൈദരലി തങ്ങള്‍ ഉദ്ഘാടനം ചെയ്യും.

പാണക്കാട് സാദിഖലി തങ്ങള്‍ മുഖ്യാതിഥിയാകും. പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി മുഖ്യപ്രഭാഷണം നടത്തും. കെ.എം ഷാജി എം.എല്‍.എ സമാപന പ്രഭാഷണം നടത്തും. 31നു നവനീതം ഓഡിറ്റോറിയത്തില്‍ മെമ്പര്‍ഷിപ്പ് അടിസ്ഥാനത്തില്‍ രൂപീകരിച്ച പുതിയ കൗണ്‍സില്‍ അംഗങ്ങളുടെ യോഗത്തില്‍ പുതിയ ഭാരവാഹികളെ തെരഞ്ഞെടുക്കും.

സംസ്ഥാന ജനറല്‍ സെക്രട്ടറി പി.ജി മുഹമ്മദ്, സംഘാടകസമിതി ഭാരവാഹികളായ വി.കെ.അബ്ദുല്‍ഖാദര്‍ മൗലവി, പി. കുഞ്ഞിമുഹമ്മദ്, അബ്ദുല്‍കരീം ചേലേരി, കബീര്‍ കണ്ണാടിപ്പറമ്പ് എന്നിവരും വാര്‍ത്താസമ്മേളനത്തില്‍ സംബന്ധിച്ചു.