സ്വന്തം ലേഖകന്‍
തിരുവനന്തപുരം: വിദേശ രാജ്യങ്ങളില്‍ നിന്ന് മെഡിക്കല്‍ പഠനം പൂര്‍ത്തിയാക്കിയവര്‍ക്കുള്ള ഇന്റേണ്‍ഷിപ്പ് ഫീസ് കുത്തനെ കൂട്ടി സര്‍ക്കാര്‍. പ്രാക്ടീസിനായുള്ള സ്ഥിരം രജിസ്‌ട്രേഷന് മുന്‍പുള്ള സര്‍ക്കാര്‍ ആശുപത്രികളിലെ ഇന്റേണ്‍ഷിപ്പ് ഫീസാണ് കുത്തനെ കൂട്ടിയത്. നേരത്തെ 1,000 രൂപയായിരുന്ന പ്രതിമാസ ഫീസ് 10,000 രൂപയാക്കിയാണ് ഉയര്‍ത്തിയത്. സ്ഥിരം രജിസ്‌ട്രേഷന് 12 മാസത്തെ ഇന്റേണ്‍ഷിപ്പാണ് വേണ്ടത്. കഴിഞ്ഞ ഒക്‌ടോബര്‍ 16നാണ് ആരോഗ്യവകുപ്പ് ഫീസ് കുത്തനെ കൂട്ടി ഉത്തരവിറക്കിയത്.
ഉത്തരവുപ്രകാരം കുറച്ചുമാസത്തേക്ക് പരിശീലനത്തിന് വിധേയരാകുകയാണെങ്കില്‍ പോലും വര്‍ഷംമുഴുവന്‍ ഫീസ് അടയ്ക്കണം. ഈ വിദ്യാര്‍ഥികള്‍ക്ക് ജില്ലാ, ജനറല്‍ ആശുപത്രികളിലാണ് ഇന്റേണ്‍ഷിപ്പ് നടത്താന്‍ അനുമതി നല്‍കുന്നത്. സ്വാശ്രയ മെഡിക്കല്‍ കോളജുകളിലെ വിദ്യാര്‍ഥികള്‍ക്ക് ഇന്റേണ്‍ഷിപ്പ് ഫീസ് പ്രതിമാസം 5,000 രൂപയാണ്. ഈ ഉത്തരവിനെതിരേ അസോസിയേഷന്‍ ഓഫ് എം.ഡി ഫിസിഷ്യന്‍സ് ഹൈക്കോടതിയെ സമീപിച്ചിരിക്കുകയാണ്. ഇവരുടെ ഹരജി ഡിസംബര്‍ 4ന് പരിഗണിക്കും.
വിദേശ സ്ഥാപനങ്ങളില്‍ നിന്ന് മെഡിക്കല്‍ യോഗ്യത നേടുന്ന ഇന്ത്യന്‍ വിദ്യാര്‍ഥികള്‍ നാഷണല്‍ ബോര്‍ഡ് ഓഫ് എക്‌സാമിനേഷന്‍ നടത്തുന്ന സ്‌ക്രീനിങ് പരീക്ഷ പാസായാല്‍ താല്‍ക്കാലിക രജിസ്‌ട്രേഷനായി അതത് സംസ്ഥാന മെഡിക്കല്‍ കൗണ്‍സിലുകളില്‍ അപേക്ഷിക്കുകയും ഇന്റേണ്‍ഷിപ്പ് വിജയകരമായി പൂര്‍ത്തിയാക്കുകയും വേണം. എന്നാല്‍, മാത്രമേ സ്ഥിരമായ രജിസ്‌ട്രേഷന്‍ ലഭിക്കുകയുള്ളൂ. അല്ലാത്തപക്ഷം അവര്‍ക്ക് ഇവിടെ പ്രാക്ടീസ് ചെയ്യാന്‍ കഴിയില്ല.