ഇസ്താംബൂള്‍: മാധ്യമപ്രവര്‍ത്തകന്‍ ജമാല്‍ ഖഷോഗിയുടെ കൊലയാളികള്‍ വലിയ വില കൊടുക്കേണ്ടിവരുമെന്ന് തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാന്‍. കുറ്റവാളികളെ നിയമത്തിന് മുന്നില്‍ കൊണ്ടുവരുമെന്നും അദ്ദേഹം പറഞ്ഞു. ഖഷോഗിയെ കൊലപ്പെടുത്തിയതില്‍ സഊദിക്ക് പങ്കുണ്ടെന്ന റിപ്പോര്‍ട്ട് യു.എന്‍ കഴിഞ്ഞ ദിവസം പുറത്തുവിട്ടിരുന്നു. ഇതിന് പിന്നാലെയാണ് ഉര്‍ദുഗാന്റെ പ്രതികരണം.
സഊദി കിരീടാവകാശി മുഹമ്മദ് ബിന്‍ സല്‍മാനും ഭരണകൂടത്തിലെ ഉന്നത വ്യക്തികള്‍ക്കും കൊലപാതകത്തില്‍ ബന്ധമുണ്ടെന്ന് യു.എന്‍ ഫോറന്‍സിക് റിപ്പോര്‍ട്ടില്‍ പറയുന്നു. മനുഷ്യാവകാശ വിദഗ്ധ ആഗ്നസ് കല്ലാമാര്‍ഡിന്റെ നേതൃത്വത്തിലാണ് 100 പേജുള്ള റിപ്പോര്‍ട്ട് തയാറാക്കിയത്.

യു.എന്‍ റിപ്പോര്‍ട്ട് അടിസ്ഥാന രഹിതമെന്ന് സഊദി

റിയാദ്: മാധ്യമ പ്രവര്‍ത്തകന്‍ ജമാല്‍ ഖഷോഗിയുടെ കൊലപാതകത്തില്‍ സഊദിയുടെ പങ്ക് വ്യക്തമാക്കി യു.എന്‍ മനുഷ്യാവകാശ കൗണ്‍സില്‍ പുറത്തുവിട്ട അന്വേഷണ റിപ്പോര്‍ട്ട് തള്ളി സഊദി അറേബ്യ രംഗത്തെത്തി.
സഊദിയെ പ്രതിക്കൂട്ടിലാക്കിയ റിപ്പോര്‍ട്ട് വൈരുധ്യങ്ങള്‍ നിറഞ്ഞതും അടിസ്ഥാനരഹിതമായ വാദങ്ങള്‍ അടങ്ങിയതുമാണെന്ന് സഊദി വിദേശ കാര്യ സഹമന്ത്രി ആദില്‍ അല്‍ജുബൈര്‍ പറഞ്ഞു. ആഗ്നസ് കല്ലാമാര്‍ഡ് തയാറാക്കിയ റിപ്പോര്‍ട്ടില്‍ പുതുതായി ഒരു കാര്യവും ഇല്ലെന്നും ഇതെല്ലാം നേരത്തേ തന്നെ ആരോപിക്കപ്പെട്ടതാണെന്നും എന്നാല്‍ അതെല്ലാം അവിശ്വസനീയമാണെന്നും അദ്ദേഹം കൂട്ടിച്ചേര്‍ത്തു. കൊലപാതക കേസില്‍ നടക്കുന്ന വിചാരണ വിദേശ പ്രതിനിധികളുടെ സാന്നിധ്യത്തിലാണ് നടക്കുന്നത്. യു.എന്‍ രക്ഷാ സമിതി സ്ഥിരാംഗങ്ങളായ അഞ്ചു രാജ്യങ്ങളുടെ സഊദി എംബസികളില്‍ നിന്നുള്ള പ്രതിനിധികളും തുര്‍ക്കി പ്രതിനിധികളും സഊദി മനുഷ്യാവകാശ സംഘടനാ പ്രതിനിധികളുമാണ് കോടതിയില്‍ ഹാജരാകുന്നത്. സഊദി ഭരണാധികാരികളുടെ ആജ്ഞ പ്രകാരം പൂര്‍ണമായും സ്വതന്ത്രമായ അന്വേഷണവും വിചാരണകളുമാണ് നടക്കുന്നതെന്നും അദ്ദേഹം കൂട്ടിച്ചേര്‍ത്തു.