കൊച്ചി: കന്യാസ്ത്രീയെ പീഡിപ്പിച്ചുവെന്ന പേരില്‍ ആരോപണം നേരിടുന്ന ജലന്ധര്‍ ബിഷപ്പ് ഫ്രാങ്കോ മുളയ്ക്കലിനെ ഇന്ന് അറസ്റ്റ് ചെയ്യാന്‍ സാധ്യത. ഇതു സംബന്ധിച്ച് അന്വേഷണ സംഘം ഉന്നത ഉദ്യോഗസ്ഥരുമായി കൂടിയാലോചന നടത്തി. ഇന്നത്തെ ചോദ്യം ചെയ്യലിന് ശേഷം അറസ്റ്റ് രേഖപ്പെടുത്തുമെന്നാണ് സൂചന.

അതേസമയം, ചോദ്യം ചെയ്യല്‍ ഇന്നും തുടരും. ഇന്ന് രാവിലെ 11 മണിക്ക് ചോദ്യം ചെയ്യലിന് ഹാജരാകാന്‍ ബിഷപ്പിന് നോട്ടിസ് നല്‍കിയിട്ടുണ്ട്. തെളിവുകള്‍ നിരത്തി ക്രോസ് വിസ്താര രീതിയിലുള്ള ചോദ്യം ചെയ്യലാണ് ഇന്ന് നടക്കുക. കന്യാസ്ത്രീയുടെ ആരോപണങ്ങള്‍ ബിഷപ്പ് ഇന്നലെ നിഷേധിച്ചിരുന്നു.

ബിഷപ്പിന്റെ മൊഴികളില്‍ വൈരുദ്ധ്യം കണ്ടതിനെ തുടര്‍ന്നാണ് അറസ്റ്റെന്നാണ് റിപ്പോര്‍ട്ട്. ആദ്യമായി പീഡനം നടന്നുവെന്ന് കന്യാസ്ത്രീ പറഞ്ഞ ദിവസം കുറവിലങ്ങാട് മഠത്തില്‍ എത്തിയിട്ടില്ലെന്നാണ് ബിഷപ്പ് മൊഴി നല്‍കിയത്. എന്നാല്‍ ഇത് തെറ്റാണെന്ന് പൊലിസ് നേരത്തെ കണ്ടെത്തിയിരുന്നു. ഇത്തരത്തില്‍ പത്തോളം വൈരുദ്ധ്യങ്ങള്‍ ബിഷപ്പിന്റെ മൊഴിലുണ്ട്.

ഇന്നലെ ഏഴ് മണിക്കൂര്‍ ബിഷപ്പിനെ ചോദ്യം ചെയ്തു. ആദ്യ മണിക്കൂറുകളില്‍ ബിഷപ്പിന് പറയാനുള്ള അവസരമാണ് നല്‍കിയത്. അതിന് ശേഷമാണ് ബിഷപ്പിനെ അന്വേഷണ സംഘം ചോദ്യം ചെയ്ത് തുടങ്ങിയത്.