തിരുവനന്തപുരം: സഹകരണ വകുപ്പിന്റെ പ്രളയ പുനരധിവാസ പദ്ധതിയുടെ ആദ്യഘട്ടത്തില്‍ 2,040 വീടുകള്‍ നിര്‍മിച്ചുനല്‍കുമെന്ന് മന്ത്രി കടകംപള്ളി സുരേന്ദ്രന്‍. ജൂലൈ 31ഓടെ ആദ്യഘട്ട വീടുകളുടെ നിര്‍മാണം പൂര്‍ത്തിയാകും. പദ്ധതിയില്‍ ഒരു വീടുപോലും നിര്‍മിച്ചുനല്‍കിയില്ലെന്ന പ്രചാരണം തെറ്റാണെന്നും മന്ത്രി വാര്‍ത്താസമ്മേളനത്തില്‍ പറഞ്ഞു.
ജൂണ്‍ 19 വരെയുള്ള കണക്കനുസരിച്ച് സംസ്ഥാനത്തൊട്ടാകെ 1,388 വീടുകളുടെ നിര്‍മാണം പൂര്‍ത്തികരിച്ച് ഗുണഭോക്താക്കള്‍ക്ക് കൈമാറിയിട്ടുണ്ട്. 101 വീടുകള്‍ നിര്‍മാണം പൂര്‍ത്തിയായി കൈമാറ്റത്തിന് സജ്ജമായി.

കെയര്‍ഹോം പദ്ധതി പ്രകാരം കോഴിക്കോട് ജില്ലയില്‍ 44 വീടുകളാണ് നിര്‍മിക്കാന്‍ തീരുമാനിച്ചത്. അതില്‍ 43 വീടുകളുടെ നിര്‍മാണം പൂര്‍ത്തിയായി. 39 വീടുകള്‍ ഗുണഭോക്താക്കള്‍ക്ക് കൈമാറി. നാലു വീടുകള്‍ കൈമാറ്റത്തിന് സജ്ജമായിക്കഴിഞ്ഞു. ശേഷിക്കുന്ന ഒരു വീടിന്റെ മേല്‍ക്കൂരയുടെ കോണ്‍ക്രീറ്റിങ് കഴിഞ്ഞ് ബാക്കി നിര്‍മാണ പ്രവര്‍ത്തനം തുടരുകയാണെന്നും മന്ത്രി പറഞ്ഞു.