വൈപ്പിന്‍: കോളജ് യൂനിയന്‍ തെരഞ്ഞെടുപ്പുമായി ബന്ധപ്പെട്ട് രണ്ട് ദിവസങ്ങളിലായി വൈപ്പിന്‍ ഗവണ്‍മെന്റ് കോളജില്‍ അരങ്ങേറിയ സംഘര്‍ഷത്തില്‍ വിദ്യാര്‍ഥികള്‍ ഉള്‍പ്പെടെ നൂറോളം പേര്‍ക്കെതിരേ ഞാറക്കല്‍ പൊലിസ് കേസെടുത്തു.
തിങ്കളാഴ്ച്ച എളങ്കുന്നപ്പുഴയില്‍ ഗവണ്‍മെന്റ് കോളെജില്‍ എസ്.എഫ്.ഐ നേതൃത്വത്തില്‍ നടത്തിയ മാര്‍ച്ചില്‍ സംഘര്‍ഷം ഉണ്ടായതിനെ തുടര്‍ന്നാണ് കേസെടുത്തത്. നേരത്തെ എസ്.എഫ്.ഐ കോളെജില്‍ നടത്തിയ സമരത്തെ തുടര്‍ന്ന് സമാധാന അന്തരീക്ഷം നഷ്ടപ്പെട്ടതോടെ യൂണിയന്‍ ചെയര്‍മാന്‍ അടക്കം ആറുപേരെ കോളെജ് സസ്‌പെന്റ് ചെയ്തിരുന്നു. ഇതിനെ തുടര്‍ന്നുണ്ടായ സമര കോലാഹലങ്ങളാണ് എളങ്കുന്നപ്പുഴയില്‍ സംഘര്‍ഷ മേഖലയാക്കിയത്.
യുണിയന്‍ പ്രതിനിധികളെ സസ്‌പെന്റ് ചെയ്തതോടെ വിദ്യാര്‍ഥികള്‍ പഠിപ്പ് മുടക്ക് സമരം നടത്തിയെങ്കിലും ഒരു വിഭാഗം വിദ്യാര്‍ഥികള്‍ ക്ലാസില്‍ നിന്ന് ഇറങ്ങാന്‍ തയാറായില്ല.
ഇത് കോളെജിലെ അധ്യാപകരുടെ സമ്മര്‍ദം മൂലമാണെന്ന് എസ്.എഫ്.ഐക്കാര്‍ ആരോപിച്ചിരുന്നു. ഇതോടെ എസ്.എഫ്.ഐ ക്കാര്‍ക്ക് പുറമെ കോളെജിന് പുറത്ത് നിന്നും ഡി.വൈ.എഫ്.ഐ പ്രവര്‍ത്തകര്‍ കോളെജില്‍ പ്രവേശിച്ചതാണ് കൂടുതല്‍ സംഘര്‍ഷാവസ്ഥ ഉണ്ടാക്കിയത്. തിങ്കളാഴ്ച്ച നടത്തിയ സമരം കൈയാങ്കളി ആയതോടെയാണ് പൊലിസ് ഇടപ്പെട്ട് സമാധാന അന്തരീക്ഷം വീണ്ടെടുത്തത്. എസ്.എഫ്.ഐ വൈപ്പിന്‍ ഏരിയ പ്രസിഡന്റ് കെ.ജെ ജ്യോതിഷ്, സെക്രട്ടറി എന്‍.എസ് സൂരജ് തുടങ്ങി ഡി.വൈ.എഫ്.ഐ പ്രവര്‍ത്തകര്‍ ഉള്‍പ്പെടെയുള്ളവര്‍ക്കെതിരെയാണ് കേസ്.