അങ്കമാലി: പ്രളയബാധിതരായ വിദ്യാര്‍ഥികള്‍ക്ക് വിതരണം ചെയ്യുന്നതിനായി സമാഹരിച്ച പഠനോപകരങ്ങള്‍ അങ്കമാലി റെസ്റ്റ് ഹൗസില്‍ സൂക്ഷിതിനെ ചൊല്ലി തര്‍ക്കവും സംഘര്‍ഷവും. എല്‍.ഡി.എഫ്, യു.ഡി.എഫ് പ്രവര്‍ത്തകര്‍ തമ്മിലാണ് ബുധനാഴ്ച സംഘര്‍ഷമുണ്ടായത്. പ്രശ്‌നം രൂക്ഷമായതോടെ തഹസീല്‍ദാര്‍ സന്ധ്യാദേവി എത്തി മുറി പൂട്ടി സീല്‍ ചെയ്തു. റോജി എം.ജോണ്‍ എം.എല്‍.എയുടെ നേതൃത്വത്തില്‍ സമാഹരിച്ചിരുന്ന സാധനങ്ങളാണ് അങ്കമാലി റെസ്റ്റ് ഹൗസില്‍ സൂക്ഷിച്ചിരുന്നത്. ബാഗ് ഉള്‍പ്പെടെയുള്ള പഠനോപകരങ്ങളാണ് ഉണ്ടായിരുന്നത്. സാധനങ്ങള്‍ വിതരണം ചെയ്യാതെ സൂക്ഷിച്ചിരിക്കുകയാണെന്ന് ആരോപിച്ച് സി.പി.എം പ്രവര്‍ത്തകര്‍ എത്തി റെസ്റ്റ് ഹൗസില്‍ സാധനങ്ങള്‍ സൂക്ഷിച്ചിരുന്ന മുറിയുടെ മുന്നില്‍ കുത്തിയിരുന്നു.
വിവരമറിഞ്ഞ് എം.എല്‍.എയും കോണ്‍ഗ്രസ് പ്രവര്‍ത്തകരും റെസ്റ്റ് ഹൗസിലെത്തി. ഡി.വൈ.എഫ്.ഐ, യൂത്ത് കോണ്‍ഗ്രസ് പ്രവര്‍ത്തകരും കൂടി സ്ഥലത്തെത്തിയതോടെ സംഘര്‍ഷാവസ്ഥയായി. ഇരുകൂട്ടരും മുദ്യാവാക്യം വിളി തുടങ്ങിയതോടെ പൊലിസ് ഇടപെട്ടു. സംഘര്‍ഷാവസ്ഥ കണക്കിലെടുത്ത് കൂടുതല്‍ പൊലിസ് സ്ഥലത്തെത്തി. ഇതിനിടെ ചെറിയ തോതില്‍ ഉന്തുംതള്ളുമുണ്ടായി. തഹസീല്‍ദാര്‍ എത്തി യു.ഡി.എഫ്.എഫ്, എല്‍.ഡി.എഫ് നേതാക്കളുമായും പൊലിസുമായും ചര്‍ച്ച നടത്തി. തുടര്‍ന്നാണ് സാധനങ്ങള്‍ സൂക്ഷിച്ചിരുന്ന മുറി പൂട്ടി സീല്‍ ചെയ്തത്. റെസ്റ്റ് ഹൗസില്‍ സൂക്ഷിച്ചിട്ടുള്ള സാധനങ്ങളില്‍ സര്‍ക്കാരിന്റേതായി ഒന്നുമില്ലെന്ന് തഹസീല്‍ദാര്‍ പറഞ്ഞു. മുറി സീല്‍ ചെയ്യുന്നതിനിടെ ഡി.വൈ.എഫ്.ഐ, യൂത്ത് കോണ്‍ഗ്രസ് പ്രവര്‍ത്തകര്‍ സംഘം ചേര്‍ന്ന് നിന്ന് വീണ്ടും മുദ്യാവാക്യം മുഴക്കി. തുടര്‍ന്ന് സംഘര്‍ഷമുണ്ടായി. പൊലിസും നേതാക്കളും ഇടപെട്ട് ഇരുകൂട്ടരെയും അനുനയിപ്പിച്ചു.