തിരുവനന്തപുരം: അവയവ കച്ചവട മാഫിയക്കെതിരായ സംവിധായകന്‍ സനല്‍കുമാര്‍ ശശിധരന്റെ പരാതിയില്‍ അന്വേഷണത്തിന് ഉത്തരവിട്ട് ഡി.ജി.പി. തിരുവനന്തപുരം റൂറല്‍ എസ്.പിക്കാണ് അന്വേഷണച്ചുമതല. ബന്ധുവിന്റെ മരണത്തില്‍ അവയവ മാഫിയക്ക് പങ്കുണ്ടെന്നായിരുന്നു സനല്‍കുമാറിന്റെ ആരോപണം.

സംസ്ഥാനത്ത് അവയവ മാഫിയയ്‌ക്കെതിരേ ക്രൈംബ്രാഞ്ച് അന്വേഷണം നടക്കുന്നതിനിടെയാണ് തുറന്നുപറച്ചിലുമായി സനല്‍കുമാര്‍ രംഗത്തെത്തിയത്. അച്ഛന്റെ സഹോദരിയുടെ മകളും തിരുവനന്തപുരം പെരുമ്പഴുതൂര്‍ സ്വദേശിയുമായ സന്ധ്യ കരള്‍ വില്‍പന നടത്തിയതും അതിനുപിന്നിലെ ദുരൂഹതയുമാണ് പരാതിയിലുള്ളത്. തെളിവുനശിപ്പിക്കാന്‍ ആശുപത്രി അധികൃതരും പൊലിസും കൂട്ടുനില്‍ക്കുന്നതായി സംശയമുണ്ടെന്നും ആരോപിച്ചിരുന്നു.

നവംബര്‍ ഏഴിന് വൈകിട്ടാണ് സന്ധ്യ മരിക്കുന്നത്. നെയ്യാറ്റിന്‍കര താലൂക്ക് ആശുപത്രിയില്‍ ഇന്‍ക്വസ്റ്റ് നടപടികള്‍ക്കിടെ ആശുപത്രി അധികൃതരുടെയും പൊലിസിന്റെയും ഭാഗത്തുനിന്നുണ്ടായ അസ്വാഭാവിക നീക്കങ്ങളാണ് ദുരൂഹതകളുടെ തുടക്കമെന്ന് സനല്‍ പറയുന്നു. മൃതദേഹത്തില്‍ കണ്ട അടയാളങ്ങള്‍ രേഖപ്പെടുത്താന്‍ ഇന്‍ക്വസ്റ്റ് സമയത്ത് പൊലിസ് തയാറായില്ല.

എറണാകുളത്ത് നഴ്‌സിങ് വിദ്യാര്‍ഥിയായ മകളോട് അന്വേഷിച്ചപ്പോഴാണ് 2018ല്‍ സന്ധ്യ പത്ത് ലക്ഷം രൂപയ്ക്ക് കരള്‍ വിറ്റത് താന്‍ അറിയുന്നത്. 

വൃക്ക, ഹൃദയ സംബന്ധമായ രോഗങ്ങള്‍ സന്ധ്യക്കുണ്ടായിരുന്നിട്ടും അവയവദാനം നടന്നതില്‍ സംശയമുണ്ടെന്ന് സനല്‍കുമാര്‍ പറഞ്ഞു. 

ഒരുമാസം മുന്‍പ് സന്ധ്യക്ക് കൊവിഡ് ബാധിക്കുകയും പിന്നീട് നെഗറ്റീവാകുകയും ചെയ്തിരുന്നു. എന്നാല്‍, വീണ്ടും കൊവിഡ് സ്ഥിരീകരിച്ചെന്ന് ചൂണ്ടിക്കാട്ടി മൃതദേഹം പോസ്റ്റ്‌മോര്‍ട്ടം ചെയ്യാത്തതിലും ദുരൂഹതയുണ്ടെന്ന് സനല്‍ പരാതിയില്‍ പറയുന്നു.