കൊല്ലം: നിരവധി കഞ്ചാവുകേസുകളിലേയും കൊലപാതകമുള്‍പ്പെടെയുള്ള ക്രിമിനല്‍ കേസുകളിലെ പ്രതിയും കൂട്ടാളിയും ഒന്നേകാല്‍ കിലോ കഞ്ചാവുമായി കൊല്ലം എക്‌സൈസിന്റെ പിടിയിലായി.
കിളികൊല്ലൂര്‍ കാണ്ണിരംമൂട് കടുക്കാശേരി സുജിത് ഭവനില്‍ സുജിത്(29), വടക്കേവിള കൊച്ച് ഡീസന്റ്മുക്ക് രമ്യാഭവനില്‍ പന്തളം കണ്ണന്‍ എന്ന് വിളിക്കുന്ന വി വിഷ്ണു(25) എന്നിവരാണ് പിടിയിലായത്.
വിഷ്ണുവിനെ കൊല്ലം റെയില്‍വെ സ്റ്റേഷന് മുന്നിലുള്ള വെയിറ്റിങ് ഷെഡില്‍ നിന്നാണ് പിടികൂടിയത്. വിഷ്ണുവാണ് തമിഴ്‌നാട്ടില്‍ നിന്നും ഒന്നര കിലോ കഞ്ചാവുമായി കൊല്ലത്തെത്തിയത്. വിഷ്ണുവിനെ ചോദ്യം ചെയ്തതിനെത്തുടര്‍ന്നാണ് സുജിത്തിനെ വീട്ടില്‍ നിന്നും തുടരന്വേഷണത്തിന്റെ ഭാഗമായി അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
കൊല്ലം എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഐ നൗഷാദിന്റെ നേതൃത്വത്തില്‍ പ്രിവന്റീവ് ഓഫിസര്‍മാരായ രാജു, ഷിഹാബുദ്ദീന്‍, സിവില്‍ എക്‌സൈസ് ഓഫിസര്‍മാരായ ദിലീപ്കുമാര്‍, രഞ്ജിത്ത്, അനീഷ് എം.ആര്‍, വിഷ്ണുരാജ് എന്നിവരടങ്ങിയ സംഘമാണ് പ്രതികളെ പിടികൂടിയത്.