സാവോ പോളോ: കോപാ അമേരിക്കയിലെ മൂന്നാം മത്സരത്തില്‍ ബ്രസീല്‍ ഇന്ന് പെറുവിനെ നേരിടും. ഒരു ജയവും ഒരു സമനിലയും ഉള്ള ബ്രസീല്‍ നിലവില്‍ നാല് പോയിന്റുമായി ഗ്രൂപ്പില്‍ ഒന്നാമതമാണ്. രണ്ടാം സ്ഥാനത്തുള്ള പെറുവിനും നാല് പോയിന്റാണുള്ളത്. ആദ്യ മത്സരത്തില്‍ എതിരില്ലാത്ത മൂന്ന് ഗോളിന് ബൊളീവിയയെ തകര്‍ത്ത ബ്രസീല്‍ രണ്ടാം മത്സരത്തില്‍ വെനസ്വലയുമായി സമനിലയില്‍ പിരഞ്ഞു.
ഇന്നത്തെ മത്സരത്തില്‍ ജയിച്ചാലും സമനിലയിലായാലും ബ്രസീലിന് പ്രീക്വാര്‍ട്ടര്‍ ഉറപ്പികാനാകും. ബ്രസീല്‍ തോല്‍ക്കുകയും വെനസ്വല ജയിക്കുകയും ചെയ്താല്‍ ബ്രസീല്‍ മൂന്നാം സ്ഥാനത്തേക്ക് പിന്തള്ളപ്പെടും. അങ്ങനെ ആണെങ്കില്‍ മികച്ച മൂന്നാം സ്ഥാനക്കാരായി പ്രീക്വാര്‍ട്ടറില്‍ പ്രവേശിക്കുന്നതും കാത്തിരിക്കേണ്ടി വരും. വെനസ്വലക്കെതിരേയുള്ള ആദ്യ മത്സരത്തില്‍ സമനില നേടിയ പെറു രണ്ടാം മത്സരത്തില്‍ ബൊളീവിയയെ 3-1 ന് തകര്‍ത്തിരുന്നു. രണ്ട് ടീമുകളും പ്രീ ക്വാര്‍ട്ടര്‍ പ്രതീക്ഷയില്‍ ഇറങ്ങുന്നതിനാല്‍ ഇന്നത്തെ മത്സരത്തില്‍ തീ പാറും. മറ്റൊരു മത്സരത്തില്‍ വെനസ്വല ബൊളീവിയയെ നേരിടും.