വടക്കാഞ്ചേരി: പ്രളയ ദുരിതമേഖലയിലെ ഫലവൃക്ഷങ്ങള്‍ കാലം തെറ്റി കൂട്ടത്തോടെ പൂക്കുന്നത് ജനങ്ങള്‍ക്ക് കൗതുക കാഴ്ച്ചയാകുമ്പോള്‍ അതില്‍ ആശങ്കയും പടരുന്നു.
മാവുകളാണ് വന്‍തോതില്‍ പൂക്കുന്നത്. സാധാരണ ഫെബ്രുവരി മാസത്തിലാണ് മാവുകള്‍ പൂക്കുന്നത്. എന്നാല്‍ സെപ്റ്റംബര്‍ ആദ്യവാരം തന്നെ മാവുകള്‍ പൂത്തുലഞ്ഞത് വലിയ കൗതുകം സൃഷ്ടിയ്ക്കുകയാണ്.
ഏതാനും മാവുകള്‍ മാങ്ങകളാലും നിറയുകയാണ്. മാമ്പഴകാലം കഴിഞ്ഞ് മൂന്ന് മാസം പിന്നിടുമ്പോഴാണ് ഇപ്പോഴത്തെ അപൂര്‍വ പ്രതിഭാസം.
പ്രളയം തിമര്‍ത്താടിയ തണുത്ത കാലാവസ്ഥയില്‍ നിന്ന് വളരെ പെട്ടെന്ന് അന്തരീക്ഷ ഊഷ്മാവ് ഉയര്‍ന്നതാണ് അപൂര്‍വ പ്രതിഭാസത്തിന് കാരണമെന്ന വിലയിരുത്തലാണ് ശാസ്ത്രലോകത്തിനുള്ളത്.
പുഷ്പിക്കലിന് സഹായിക്കുന്ന ഹോര്‍മോണുകള്‍ ഫലവൃക്ഷങ്ങളില്‍ രൂപപ്പെടുന്നതും കൂട്ട പൂക്കലിന് വഴിവെയ്ക്കുന്നതായും ആശങ്കപെടേണ്ടതില്ലെന്നും ശാസ്ത്രഞ്ജര്‍ വെളിപ്പെടുത്തുന്നു.