നിലമ്പൂര്‍: പോത്തുകല്ലിലെ തന്ത്രം അമരമ്പലത്തും നടപ്പാക്കാന്‍ സി.പി.എം അണിയറയില്‍ നീക്കം ആരംഭിച്ചു. കോണ്‍ഗ്രസിലെ ഭിന്നത മുതലെടുത്താണ് പോത്തുകല്ലില്‍ ഭരണം പിടിച്ചെടുത്തത്. അതേ രീതിയിലാണ് അമരമ്പലത്ത് പയറ്റുന്നത്.
കോണ്‍ഗ്രസിലെ അനിതാ രാജു രാജിവച്ചതോടെ 19 സീറ്റുകളില്‍ അമരമ്പലത്ത് യു.ഡി.എഫിനും എല്‍.ഡി.എഫിനും ഒന്‍പത് സീറ്റുകള്‍ വീതമാണ്. അനിതയെ സി.പി.എം പാളയത്തിലെത്തിച്ച് ഭരണം പിടിച്ചെടുക്കാനാണ് കരുക്കള്‍ നീക്കുന്നത്. കോണ്‍ഗ്രസിലെ എ ഗ്രൂപ്പിലെ വിഭാഗീയതയിലൂടെയാണ് സി.പി.എം മുതലെടുപ്പ് നടത്തുന്നത്.
സി.പി.ഐയുടെ കുത്തകയിലായിരുന്ന ഉപ്പുവള്ളി വാര്‍ഡാണ് കഴിഞ്ഞ പഞ്ചായത്ത് തെരഞ്ഞെടുപ്പില്‍ സി.പി.ഐ-സി.പി.എം ഭിന്നതയെ തുടര്‍ന്ന് കോണ്‍ഗ്രസ് പിടിച്ചെടുത്തത്.
പകപോക്കലെന്നോണം അനിത രാജുവിനെ രാജിവയ്പ്പിച്ച് കൂടെകൂട്ടി സി.പിഎമ്മും സി.പി.ഐയും ഒന്നിക്കുകയും ചെയ്തതോടെ വാര്‍ഡും ഭരണവും തിരിച്ചുപിടിക്കാനാണ് എല്‍.ഡി.എഫ് തന്ത്രങ്ങള്‍ മെനയുന്നത്. പി.വി അന്‍വര്‍ എം.എല്‍.എയെ മുന്നില്‍ നിര്‍ത്തിയാണ് പ്രവര്‍ത്തനങ്ങള്‍ക്ക് ചുക്കാന്‍ പിടിച്ച് പോത്തുകല്ലില്‍ രാഷ്ട്രീയ നേട്ടം കൊയ്‌തെടുത്തത്. അമരമ്പലം കൂടി പിടിച്ചെടുത്താല്‍ മണ്ഡലത്തില്‍ കോണ്‍ഗ്രസിന് കനത്ത തിരിച്ചടിയാകും നേരിടേണ്ടിവരിക.