തിരുവനന്തപുരം: അന്ധനായ ലോട്ടറി വില്‍പനക്കാരനെ കബളിപ്പിച്ച് ലോട്ടറി തട്ടിയെടുത്തയാളെ പൊലിസ് പിടികൂടി. എറണാകുളം മരട് ചെമ്പക്കര ആയത്തുപറമ്പില്‍ വീട്ടില്‍ സുനില്‍കുമാര്‍ (47) നെയാണ് തമ്പാനൂര്‍ പൊലിസ് അറസ്റ്റ് ചെയ്തത്. ശനിയാഴ്ച രാവിലെ തമ്പാനൂര്‍ റെയില്‍വേ സ്റ്റേഷന് സമീപത്തെ ഓട്ടോ സ്റ്റാന്‍ഡില്‍ നിന്നാണ് ഇയാളെ പിടികൂടിയത്. ലോട്ടറി വില്‍പ്പനക്കാരനെ കബളിപ്പിച്ച് ടിക്കറ്റുമായി പോകുന്ന വിഡിയോ കണ്ടതാണ് ഇയാളെ തിരിച്ചറിയാന്‍ സഹായകമായത്. അടുത്തിടെ മോഷണക്കേസില്‍ ജയിലില്‍ നിന്ന് പുറത്തിറങ്ങിയ ആളാണ് സുനിലെന്ന് പൊലിസ് പറഞ്ഞു.

വെള്ളിയാഴ്ച ഉച്ചയ്ക്ക് രണ്ടിന് തമ്പാനൂര്‍ ബസ് ടെര്‍മിനലില്‍ അന്ധനായ ലോട്ടറി വില്‍പനക്കാരനെ കബളിപ്പിച്ചാണ് ഇയാള്‍ കടന്നത്. ലോട്ടറി വാങ്ങാനെന്ന വ്യാജേന അടുത്തുകൂടിയ ഇയാള്‍ വില്‍പനക്കാരന്റെ കൈയില്‍ നിന്നു ടിക്കറ്റ് കൈക്കലാക്കിയ ശേഷം പണം നല്‍കാതെ സ്ഥലം വിടുകയായിരുന്നു. വര്‍ഷങ്ങളായി തലസ്ഥാനത്തു ലോട്ടറിക്കച്ചവടം നടത്തുന്ന വാഴച്ചല്‍ ചിറയാണിക്കര ഗീതാഭവനില്‍ സുരയില്‍ നിന്നാണ് ഇയാള്‍ ലോട്ടറി തട്ടിയെടുത്തത്. നിരീക്ഷണ കാമറയില്‍ പതിഞ്ഞ ദൃശ്യമാണ് പ്രതിയെ തിരിച്ചറിയാന്‍ സഹായകമായത്.

640 രൂപ വിലയുള്ള 23 ടിക്കറ്റുകളാണ് ഇയാള്‍ കൈക്കലാക്കിയത്. നീല ജീന്‍സും വെള്ളയും ഇളം നീലയും കറുപ്പും വരയുള്ള ടീഷര്‍ട്ടും കൈയില്‍ മൊബൈല്‍ ഫോണും തോള്‍ ബാഗുമായെത്തിയ പ്രതി സുരന്റെ കൈയിലുണ്ടായിരുന്ന ഒരു കെട്ട് ലോട്ടറി വാങ്ങിയ ശേഷം മറ്റാരും കാണുന്നില്ലെന്ന് ഉറപ്പാക്കിയശേഷമായിരുന്നു ടിക്കറ്റുമായി മുങ്ങിയത്. തമ്പാനൂര്‍ ഇന്‍സ്‌പെക്ടര്‍ അജയകുമാര്‍, സബ് ഇന്‍സ്‌പെക്ടര്‍മാരായ ജിജുകുമാര്‍, അരുണ്‍ രവി, എ.എസ്.ഐ സുരേഷ്‌കുമാര്‍ എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്. പ്രതിയെ കോടതിയില്‍ ഹാജരാക്കി റിമാന്റ് ചെയ്തു.