കോഴിക്കോട്: ഗോകുലം കേരള എഫ്.സി താരം അര്‍ജുന്‍ ജയരാജ് കേരള ബ്ലാസ്റ്റേഴ്‌സുമായി കരാറിലെത്തി. താരം നേരത്തെ ബ്ലാസ്റ്റേഴ്‌സിലെത്തുമെന്ന് റിപ്പോര്‍ട്ടുണ്ടായിരുന്നു. എന്നാല്‍ സാങ്കേതിക പ്രശ്‌നം കാരണം കരാറിലെത്തുന്നത് നീളുകയായിരുന്നു. കഴിഞ്ഞ ദിവസം ബ്ലാസ്റ്റേഴ്‌സ് അധികൃതര്‍ ഗോകുലവുമായി നടത്തിയ ചര്‍ച്ചയിലാണ് തീരുമാനമായത്. കേരള ബ്ലാസ്റ്റേഴ്‌സുമായി മൂന്ന് വര്‍ഷത്തെ കരാറിലാണ് ഒപ്പുവച്ചിരിക്കുന്നത്. സാങ്കേതികമായ നടപടികള്‍ പൂര്‍ത്തിയാക്കിയാല്‍ കേരള ബ്ലാസ്റ്റേഴ്‌സ് അര്‍ജുന്റെ വരവ് ഔദ്യോഗികമായി പ്രഖ്യാപിക്കും.
ട്രാന്‍സ്ഫര്‍ തുകയുടെ കാര്യത്തില്‍ ആയിരുന്നു കേരള ബ്ലാസ്റ്റേഴ്‌സും ഗോകുലം കേരള എഫ്.സിയുമായി അഭിപ്രായ വിത്യാസമുണ്ടായിരുന്നത്. ഗോകുലം കേരള എഫ്.സിയില്‍ ഒരു വര്‍ഷത്തെ കരാര്‍കൂടി ബാക്കി ഇരിക്കെ ആണ് അര്‍ജുന്‍ ബ്ലാസ്റ്റേഴ്‌സിലേക്ക് ചേക്കേറുന്നത്. ട്രാന്‍സ്ഫര്‍ തുക ആയി 21 ലക്ഷം കേരള ബ്ലാസ്റ്റേഴ്‌സ് ഗോകുലം കേരള എഫ്.സിക്ക് നല്‍കും.

മധ്യനിര താരമായ അര്‍ജുന്‍ ജയരാജ് അവസാന ര@ണ്ട് ഐലീഗ് സീസണുകളിലും ഗോകുലം കേരള എഫ്.സിയുടെ പ്രധാന താരമായിരുന്നു. ഗോളുകള്‍ നേടാനും ഗോള്‍ അവസരം സൃഷ്ടിക്കാനും കഴിവുള്ള താരമാണ് അര്‍ജുന്‍.