മുംബൈ: ബോളിവുഡ് നടി റീമാ ലാഗു അന്തരിച്ചു. ഇന്നലെ പുലര്‍ച്ചെ മൂന്നോടെ ഹൃദയസ്തംഭനത്തെ തുടര്‍ന്നായിരുന്നു അന്ത്യം. 59 വയസായിരുന്നു. നെഞ്ചുവേദനയെ തുടര്‍ന്ന് രാത്രി ഒരു മണിയോടെ ആശുപത്രിയില്‍ പ്രവേശിപ്പിക്കപ്പെട്ട അവരുടെ അന്ത്യം മുംബൈയിലെ കോകിലാബെന്‍ ധിരുഭായ് അംബാനി ആശുപത്രിയിലായിരുന്നു. ആമിര്‍ ഖാന്‍, കിരണ്‍ റാവു, കജോള്‍, റിഷി കപൂര്‍ തുടങ്ങിയവര്‍ സംസ്‌കാരച്ചടങ്ങുകളില്‍ പങ്കെടുക്കാന്‍ എത്തി.
മറാത്തി നാടകവേദികളില്‍ സജീവമായിരുന്ന റീമാ ലാഗു, സല്‍മാന്‍ ഖാന്‍, അക്ഷയ് കുമാര്‍ തുടങ്ങിയ താരങ്ങള്‍ക്കൊപ്പം നിരവധി ബോളിവുഡ് ചിത്രങ്ങളില്‍ അഭിനയിച്ചു. അമിതാഭ് ബച്ചന്‍, റിഷി കപൂര്‍, മാധുരി ദീക്ഷിത്, അക്ഷയ് കപൂര്‍, പ്രിയങ്ക ചോപ്ര തുടങ്ങിയവര്‍ ട്വിറ്ററിലൂടെ ദു:ഖം രേഖപ്പെടുത്തി.
അമ്മ റോളുകളിലൂടെ ശ്രദ്ധേയയായ നടിയായിരുന്നു റീമാ ലാഗു. ടി.വി സീരിയലുകളിലും ശ്രദ്ധേയയായിരുന്നു അവര്‍. നാലു തവണ മികച്ച സഹനടിക്കുളള ഫിലിംഫെയര്‍ അവാര്‍ഡ് നേടിയിട്ടുണ്ട്.