പട്‌ന: മസ്തിഷ്‌ക ജ്വരം ബാധിച്ച് ചികിത്സയില്‍ കഴിയുന്ന കുട്ടികള്‍ക്കുവേണ്ടി പണം സ്വരൂപിക്കാന്‍ ഷൂ പോളിഷ് ചെയ്ത് യുവാക്കളുടെ സന്നദ്ധപ്രവര്‍ത്തനം. ജന്‍ അധികാര്‍ ഛാത്ര പരിഷത്തിന്റെ നേതൃത്വത്തിലാണ് ഒരു സംഘം യുവാക്കള്‍ ഷൂ പോളിഷ് ചെയ്ത് കുട്ടികളുടെ ചികിത്സക്കായി പണം സ്വരൂപിച്ചത്.

രാജ്യത്ത് യോഗ നടത്താനായി കോടികളാണ് ചെലവഴിക്കുന്നത്. എന്നാല്‍ ആശുപത്രികളില്‍ ആവശ്യത്തിന് ബെഡ് സൗകര്യം, മരുന്നുകള്‍, വൈദ്യുതി, മറ്റ് അടിസ്ഥാന സൗകര്യങ്ങള്‍ എന്നിവ ഏര്‍പ്പെടുത്താന്‍ ഭരണകൂടങ്ങള്‍ക്ക് കഴിയുന്നില്ലെന്നും ജന്‍ അധികാര്‍ ഛാത്ര പരിഷത്ത് വൈസ് പ്രസിഡന്റ് മനീഷ് യാദവ് ആരോപിച്ചു.

മസ്തിഷ്‌ക ജ്വരം ബാധിച്ച് കുട്ടികള്‍ മരിക്കുകയാണ്. ഇനിയും മരണത്തിലേക്ക് കുട്ടികളെ വിട്ടുനല്‍കാന്‍ കഴിയില്ല. തങ്ങളുടെ കഴിവിന്റെ പരമാവധി പണം സ്വരൂപിച്ച് അവരുടെ ചികിത്സക്കായി ഉപയോഗിക്കുകയെന്നതാണ് ലക്ഷ്യമെന്നും അദ്ദേഹം പറഞ്ഞു.
മസ്തിഷ്‌ക ജ്വരം ബാധിച്ച് മുസാഫര്‍പൂര്‍ ജില്ലയില്‍ മാത്രം 100ലധികം കുട്ടികളാണ് മരിച്ചത്. ഇതൊരു വൈറസ് രോഗമാണ്. ജലദോഷത്തിനോട് സാമ്യമുള്ളതാണ് ഇതിന്റെ ലക്ഷണം. ശക്തമായ പനി, ഛര്‍ദ്ദി തുടങ്ങിയവയും ഉണ്ടാകും. വളരെ വേഗത്തില്‍ തലച്ചോറിനേയും ഹൃദയത്തേയും കിഡ്‌നിയേയും ബാധിച്ച് രോഗി മരിക്കും.