ന്യൂഡല്‍ഹി: ഭീമ കൊറേഗാവ് സംഘര്‍ഷവുമായി ബന്ധപ്പെട്ട് അറസ്റ്റിലായ മനുഷ്യാവകാശ പ്രവര്‍ത്തകരെ വിട്ടയക്കണമെന്നാവശ്യപ്പെട്ടുള്ള ഹരജി സുപ്രിംകോടതി വിധിപറയാനായി മാറ്റി. ഇന്നലെ കേസ് പരിഗണിക്കവേ അന്വേഷണവുമായി ബന്ധപ്പെട്ട കേസ് ഡയറി ഹാജരാക്കാന്‍ മഹാരാഷ്ട്ര സര്‍ക്കാരിനോട് കോടതി ആവശ്യപ്പെട്ടു.
കേസിലെ മുഴുവന്‍ കക്ഷികളോടും തിങ്കളാഴ്ചക്ക് മുന്‍പ് അവരുടെ നിലപാടറിയിക്കുന്ന കുറിപ്പ് സമര്‍പ്പിക്കാനും കോടതി ആവശ്യപ്പെട്ടു. യു.എ.പി.എ നിയമപ്രകാരം അറസ്റ്റു ചെയ്യപ്പെട്ട വിപ്ലവ കവി വരവര റാവു, സുധാ ഭരദ്വാജ്, ഗൗതം നവ്‌ലാഖ, വെര്‍ണന്‍ ഗോണ്‍സാല്‍വസ്, അരുണ്‍ ഫെരേര എന്നിവരെ വിട്ടയക്കണമെന്നാവശ്യപ്പെട്ടു പ്രമുഖ ചരിത്രകാരി റൊമീലാ ഥാപ്പറും സാമ്പത്തിക വിദഗ്ധന്‍ പ്രൊഫ. പ്രഭാത് പട്‌നായികും നല്‍കിയ ഹരജിയാണ് ചീഫ് ജസ്റ്റിസ് ദീപക് മിശ്ര അധ്യക്ഷനായ മൂന്നംഗ ബെഞ്ച് പരിഗണിക്കുന്നത്.
കേസില്‍ ഇന്നലെയും ശക്തമായ വാദമാണു നടന്നത്. നേരത്തേ അറസ്റ്റിലായ മനുഷ്യാവകാശ പ്രവര്‍ത്തകരായ മലയാളി റോണാ വില്‍സനും കഴിഞ്ഞ മാസം അറസ്റ്റിലായ സുധാ ഭരദ്വാജും എഴുതിയതെന്നവകാശപ്പെട്ടു പൊലിസ് സമര്‍പ്പിച്ച കത്തിന്റെ ഉറവിടം ഹരജിക്കാര്‍ക്കുവേണ്ടി ഹാജരായ മുതിര്‍ന്ന അഭിഭാഷകരായ ആനന്ദ് ഗ്രോവറും വൃന്ദാ ഗ്രോവറും ചോദ്യംചെയ്തു. ഇരുവരും പൊതുവെ ഹിന്ദിയും ഇംഗ്ലീഷുമാണ് ഉപയോഗിക്കാറുള്ളതെന്നും, കത്ത് മറാത്തി ഭാഷയിലാണെന്നും ഇരുവരും മറാത്തിയില്‍ നിപുണരല്ലെന്നും അഭിഭാഷകര്‍ വാദിച്ചു.
ഇതുപോലുള്ള ക്രിമിനല്‍ കേസുകളില്‍ പൊതുതാല്‍പര്യ ഹരജികള്‍ അനുവദിക്കരുതെന്നു സര്‍ക്കാരിനുവേണ്ടി ഹാജരായ അഡീഷനല്‍ സോളിസിറ്റര്‍ ജനറല്‍ തുഷാര്‍ മേത്ത ആവശ്യപ്പെട്ടു. ആര്‍ക്കും ഏത് ആശയവും പിന്തുടരാമെന്നും നിയമവിരുദ്ധ പ്രവര്‍ത്തനങ്ങളില്‍ ഏര്‍പ്പെടുകയാണെങ്കില്‍ അത് അംഗീകരിക്കാന്‍ കഴിയില്ലെന്നും തുടര്‍ന്നു സര്‍ക്കാരിനുവേണ്ടി ഹാജരായ മുതിര്‍ന്ന അഭിഭാഷകന്‍ ഹരീഷ് സാല്‍വേ വാദിച്ചു. എസ്.ഐ.ടി രൂപീകരിക്കണമെന്നതുള്‍പ്പെടെ ഹരജിക്കാരുടെ ആവശ്യങ്ങള്‍ അംഗീകരിക്കുകയാണെങ്കില്‍ പൊലിസ്, സി.ബി.ഐ, എന്‍.ഐ.എ എന്നീ അന്വേഷണ ഏജന്‍സികളെ വിശ്വസിക്കാന്‍ കഴിയാത്ത അവസ്ഥ വരുമെന്നും സാല്‍വേ ചൂണ്ടിക്കാട്ടി. എസ്.ഐ.ടി രൂപീകരണ ആവശ്യം തള്ളണമെന്നു സര്‍ക്കാര്‍ അഭിഭാഷകര്‍ ആവര്‍ത്തിച്ചാവശ്യപ്പെട്ടു.
തുടര്‍ന്നു വാദം തുടങ്ങിയ ഹരജിക്കാരുടെ അഭിഭാഷകന്‍ അഭിഷേക് സിങ്‌വി, അറസ്റ്റിലായവര്‍ക്കെതിരായ പൊലിസിന്റെ ആരോപണങ്ങള്‍ കെട്ടിച്ചമച്ചതാണെന്നു ചൂണ്ടിക്കാട്ടി. കോടതിയില്‍ സമര്‍പ്പിച്ച രേഖകളില്‍ എവിടെയും മാവോയിസ്റ്റ് ബന്ധം പരാമര്‍ശിക്കുന്നില്ല. ഒരു കത്തെഴുതിയതിന്റെ പേരില്‍ ഒരാളെ എങ്ങനെ ജയിലിലടക്കാന്‍ കഴിയുമെന്നു ചോദിച്ച അദ്ദേഹം, എതിരഭിപ്രായം പ്രകടിപ്പിക്കുന്നവരെ അടിച്ചമര്‍ത്തുന്നതിന്റെ ഭാഗമാണു അറസ്റ്റെന്നും ചൂണ്ടിക്കാട്ടി.
കഴിഞ്ഞ മാസം 20നാണ് അഞ്ചു മനുഷ്യാവകാശ പ്രവര്‍ത്തകരെ രാജ്യത്തിന്റെ വിവിധ ഭാഗങ്ങളില്‍നിന്ന് അറസ്റ്റു ചെയ്തത്. 29ന് കോടതി നിര്‍ദേശപ്രകാരം ഇവരെ വീട്ടുതടങ്കലിലേക്കു മാറ്റുകയായിരുന്നു.