തെഹ്‌റാന്‍: പുതിയ പ്രസിഡന്റിനെ തെരഞ്ഞെടുക്കാന്‍ ഇറാന്‍ ജനത ഇന്ന് പോളിങ് ബൂത്തിലേക്ക്. നിലവിലെ പ്രസിഡന്റും പരിഷ്‌കരണ വിഭാഗം സ്ഥാനാര്‍ഥിയുമായ ഹസന്‍ റൂഹാനിയും യാഥാസ്ഥിക വിഭാഗത്തിന്റെ സ്ഥാനാര്‍ഥി ഇബ്രാഹീം റെയ്‌സിയും തമ്മിലാണ് മത്സരം നടക്കുന്നത്.
റൂഹാനിയുടെ ആഭിമുഖ്യത്തില്‍ നടന്ന ലോകരാഷ്ട്രങ്ങളുമായുള്ള ആണവ കരാറിന്റെ വിധിയെഴുത്ത് കൂടിയാകും തെരഞ്ഞെടുപ്പ് എന്നാണ് കരുതപ്പെടുന്നത്. ലോകരാഷ്ട്രങ്ങള്‍ ഏര്‍പ്പെടുത്തിയ സാമ്പത്തിക ഉപരോധം നീക്കിയതിനു പകരം ഇറാന്‍ തങ്ങളുടെ ആണവ സമ്പുഷ്ടീകരണ പദ്ധതികള്‍ നിയന്ത്രിക്കാന്‍ സന്നദ്ധമായിരുന്നു. മുന്‍ പ്രസിഡന്റ് അഹ്മദ് നജാദിന്റെ കാലത്ത് അന്താരാഷ്ട്ര തലത്തില്‍ ഒറ്റപ്പെട്ട ഇറാനെ രക്ഷപ്പെടുത്താനായ റൂഹാനിക്ക് ഇറാന്‍ ജനത ഒരിക്കല്‍ കൂടി അവസരം നല്‍കുമോ എന്നാണ് ലോകം കാത്തിരിക്കുന്നത്. 1981 മുതലുള്ള ഇറാന്റെ ചരിത്രത്തില്‍ എല്ലാ പ്രസിഡന്റുമാര്‍ക്കും രണ്ടാം ഊഴത്തിനു കൂടി അവസരം ലഭിച്ചിട്ടുണ്ട്. ഈയൊരു പ്രതീക്ഷ റൂഹാനിക്കുണ്ട്. എന്നാല്‍ പരമോന്നത നേതാവ് ആയത്തുല്ല ഖാംനഇക്കു പുറമെ രാജ്യത്തെ രണ്ടു പ്രധാന പണ്ഡിത സഭകളുടെ കൂടി പിന്തുണ എതിര്‍ സ്ഥാനാര്‍ഥി റെയ്‌സിക്കുണ്ട്.
പശ്ചിമേഷ്യയിലെ മറ്റു രാഷ്ട്രങ്ങളോട് മിതനയം സ്വീകരിക്കുന്ന റൂഹാനിക്ക് മേഖലയുടെ ഭാവിയില്‍ നിര്‍ണായക സ്വാധീനമാകാന്‍ കഴിയും. എന്നാല്‍, പശ്ചിമേഷ്യയുടെ കാര്യത്തില്‍ റെയ്‌സി ഇതുവരെ നിലപാട് വ്യക്തമാക്കിയിട്ടില്ല.

ഹസന്‍ റൂഹാനി
ഇറാന്റെ ഏഴാമത്തെയും നിലവിലെയും പ്രസിഡന്റ്. പരിഷ്‌കരണ-മിതവാദി. മോഡറേഷന്‍ ആന്‍ഡ് ഡെവലപ്‌മെന്റ് പാര്‍ട്ടി നേതാവ്. അഭിഭാഷകന്‍, അക്കാദമിക പണ്ഡിതന്‍, ഗ്രന്ഥരചയിതാവ്. 1948 നവംബര്‍ 12നു ജനനം. ഗ്ലാസ്‌ഗോ കാലിഡോണിയന്‍ യൂനിവേഴ്‌സിറ്റി, യൂനിവേഴ്‌സിറ്റി ഓഫ് തെഹ്‌റാന്‍, ഖും മദ്‌റസ എന്നിവിടങ്ങളില്‍ പഠനം.

ഇബ്രാഹീം റെയ്‌സി
യാഥാസ്ഥിക വിഭാഗത്തെ പ്രതിനിധീകരിക്കുന്ന തീവ്ര ആശയഗതിക്കാരനായ പണ്ഡിതന്‍. ജഡ്ജി. ഇറാന്‍ പരമോന്നത നേതാവ് ആയത്തുല്ല ഖാംനഇയുമായി ഉറ്റ ബന്ധം. കോംപാറ്റന്റ് ക്ലര്‍ജി അസോസിയേഷന്‍ അംഗം. അസ്താന്‍ ഖുദ്‌സ് റസവിയുടെ ചെയര്‍മാനും രക്ഷാധികാരിയും. 1960 ഡിസംബര്‍ 14ന് ഇറാനിലെ മശ്ഹാദില്‍ ജനനം. ഖും മദ്‌റസയില്‍ പഠനം.