മലപ്പുറം: പത്താം ക്ലാസ് വരെയുള്ള മുഴുവന്‍ വിദ്യാലയങ്ങളിലും മലയാള പഠനം നടക്കുന്നുണ്ടോ എന്ന് ഉറപ്പാക്കാന്‍ സ്‌കൂളുകളില്‍ ഈ വര്‍ഷവും പരിശോധന. ഉപജില്ല, ജില്ല വിദ്യാഭ്യാസ ഓഫിസര്‍മാര്‍ ഓഗസ്റ്റ് 31നകം സ്‌കൂളുകളില്‍ പരിശോധന നടത്തി വിദ്യാഭ്യാസ ഉപഡയരക്ടര്‍മാര്‍ക്ക് റിപ്പോര്‍ട്ട് നല്‍കാനാണ് നിര്‍ദേശം. സംസ്ഥാന സിലബസ് പഠിപ്പിക്കുന്ന പൊതുവിദ്യാലയങ്ങളേക്കാള്‍ സി.ബി.എസ്.ഇ, സി.ഐ.എസ്.സി.ഇ, സൈനിക സ്‌കൂള്‍, കേന്ദ്രീയ വിദ്യാലയം, നവോദയ വിദ്യാലയം എന്നിവിടങ്ങളില്‍ നിര്‍ബന്ധപൂര്‍വം പരിശോധന നടത്താനാണ് നിര്‍ദേശം. മലയാളം പഠിപ്പിക്കാനാവശ്യമായ പാഠപുസ്തകങ്ങള്‍ ലഭിക്കാത്തവര്‍ക്ക് ഉടന്‍ ലഭ്യമാക്കാന്‍ എസ്.സി.ഇ.ആര്‍.ടിയെയാണ് ചുമതലപ്പെടുത്തിയിരിക്കുന്നത്.