മാഞ്ചസ്റ്റര്‍: ഓള്‍ഡ് ട്രാഫോര്‍ഡില്‍ വില്യംസണ്‍ വീണ്ടും നായകന്റെ മികവ് പുറത്തെടുത്തപ്പോള്‍ കിവീസിന് വിന്‍ഡീസിനെതിരേ മികച്ച വിജയം.ബ്രാത്‌വൈറ്റിന്റെ സെഞ്ച്വറിക്കും വിന്‍ഡീസിനെ വിജയത്തിലെത്തിക്കാന്‍ കഴിഞ്ഞില്ല. കളിയിലുടനീളം ആവേശം നിറഞ്ഞു നിന്ന മത്സരത്തില്‍ അഞ്ചു റണ്‍സിനാണ് ന്യൂസിലന്‍ഡിന്റെ വിജയം.

ന്യൂസിലന്‍ഡ് ഉയര്‍ത്തിയ 292 റണ്‍സ് എന്ന വിജയ ലക്ഷ്യം ബ്രാത്‌വൈറ്റിനു പുറമെ ക്രിസ് ഗെയിലിന്റെയും (84 പന്തില്‍ 87) ഷിമോണ്‍ ഹെറ്റ്‌മെയറിന്റെയും (45 പന്തില്‍ 54) കരുത്തില്‍  പിന്തുടര്‍ന്ന വിന്‍ഡീസ് 286 ന് ഓള്‍ഔട്ടായി. അവസാന ഏഴു പന്തില്‍ ആറു റണ്‍സെന്ന ആവേശകരമായ ഘട്ടത്തില്‍ ബ്രാത്‌വൈറ്റിന്റെ ബാറ്റില്‍ നിന്ന് ഉയര്‍ന്നു പൊങ്ങിയ പന്ത് ഏവരും സിക്‌സെന്നുറപ്പിച്ചുകാണും. എന്നാല്‍ ബൗണ്ടറി ലൈനിനു തോട്ടടുത്ത് ബോള്‍ട്ടിന്റെ കൈകളില്‍ ആ പന്ത് വിശ്രമം തേടിയപ്പോള്‍ വിന്‍ഡീസ് ആരാധകര്‍ക്കു പുറമെ മുഴുവന്‍ ക്രിക്കറ്റ് പ്രേമികളും തലയില്‍ കൈവച്ചിട്ടുണ്ടാവും.

നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ കിവീസിനെ ആദ്യ ഓവറില്‍ തന്നെ ഷെല്‍ഡന്‍ കോട്രെല്‍ ഞെട്ടിച്ചു. ആദ്യ പന്തില്‍ ഗുപ്റ്റിലിനെയും നാലാം പന്തില്‍ മന്‍ റോയേയും ഗോള്‍ഡന്‍ ഡക്കാക്കി മടക്കി.

മൂന്നാം വിക്കറ്റില്‍ ഒത്തു ചേര്‍ന്ന വില്യംസണ്‍- റോസ് ടെയലര്‍ സഖ്യമാണ് കിവീസിന് തുണയായത്. ഇരുവരും ചേര്‍ന്ന് മൂന്നാം വിക്കറ്റില്‍ നേടിയത് 160 റണ്‍സ്. 65 റണ്‍സ് നേടിയ ടെയ്‌ലര്‍ ക്രിസ് ഗെയ്‌ലിന്റെ പന്തില്‍ പുറത്തായെങ്കിലും ഒരുഭാഗത്ത് ഉറച്ചുനിന്ന വില്യംസണ്‍ തുടര്‍ച്ചയായ രണ്ടാമത്തെ സെഞ്ചുറിയിലൂടെ ടീമിനെ മികച്ച ടോട്ടലിലെത്തിച്ചു.

148(154) റണ്‍സെടുത്ത വില്യംസണെ ഷെല്‍ഡന്‍ കോട്രല്ലിന്റെ പന്തില്‍ ഷായ് ഹോപ് പിടിച്ചു പുറത്താക്കുകയായിരുന്ന. 14 ഫോറും ഒരു സിക്‌സും ഉള്‍പ്പെടുന്നതാണ് വില്യംസന്റെ ഇന്നിങ്‌സ്. വിന്‍ഡീസിനു വേണ്ടി ഷെല്‍ഡന്‍ കോട്രെല്‍ നാലു വിക്കറ്റുകള്‍ നേടി.