ന്യൂഡല്‍ഹി: സുപ്രിംകോടതിയിലേക്ക് കൂടുതല്‍ ജഡ്ജുമാരെ അനുവദിക്കണമെന്നും ഹൈക്കോടതി ജഡ്ജിമാരുടെ വിരമിക്കല്‍ പ്രായം 65 ആയി ഉയര്‍ത്തണമെന്നും ആവശ്യപ്പെട്ടുകൊണ്ട് സുപ്രിംകോടതി ചീഫ് ജസ്റ്റിസ് രഞ്ജന്‍ ഗൊഗോയ് പ്രധാനമന്ത്രിയ്ക്ക് കത്തയച്ചു.

വിവിധ ആവശ്യങ്ങള്‍ ഉന്നയിച്ചുകൊണ്ട് മൂന്ന് കത്തുകളാണ് പ്രധാനമന്ത്രിക്കയച്ചത്. ഭരണഘടനയുടെ ആര്‍ട്ടിക്കിള്‍ 128, 224A പ്രകാരം വിരമിച്ച സുപ്രിംകോടതി, ഹൈക്കോടതി ജഡ്ജിമാരെ വര്‍ഷങ്ങളായി തീര്‍പ്പുകല്പ്പിക്കാതെ കിടക്കുന്ന കേസുകളുടെ എണ്ണം കുറയ്ക്കാന്‍ യഥാക്രമം നിയമിക്കണമെന്നും സുപ്രിംകോടതിയില്‍ വിധി പറയാത്ത 58,000 ത്തോളം കേസുകളുണ്ടെന്നും ദിനംപ്രതി കേസുകളുടെ എണ്ണം വര്‍ധിക്കുകയാണെന്നും പുതിയ കേസുകള്‍ എത്തുമ്പോള്‍ കെട്ടിക്കിടക്കുന്ന കേസുകളുടെ എണ്ണം കൂടുകയാണെന്നും അദ്ദേഹം പ്രധാനമന്ത്രിക്കയച്ച കത്തില്‍ പറയുന്നു.

1988ല്‍ സുപ്രിംകോടതി ജഡ്ജിമാരുടെ എണ്ണം 18ല്‍ നിന്ന് 26 ആക്കി. പിന്നീട് 2009 ലാണ് 31 ആക്കി വര്‍ധിപ്പിച്ചത്. കേസുകളുടെ തീര്‍പ്പ് വേഗത്തിലാക്കാന്‍ ജഡ്ജിമാരുടെ എണ്ണം വര്‍ധിപ്പിക്കേണ്ടത് അത്യാവശ്യമാണ്. അപേക്ഷ പ്രാധാന്യത്തോടെ പരിഗണിക്കണമെന്നും ചീഫ് ജസ്റ്റിസ് വ്യക്തമാക്കി. ജഡ്ജിമാരുടെ വിരമിക്കല്‍ പ്രായം 62 ല്‍ നിന്ന് 65 ആയി ഉയര്‍ത്താന്‍ ഭരണഘടന ഭേദഗതി വരുത്തണമെന്നും അദ്ദേഹം ആവശ്യപ്പെട്ടു. വിരമിക്കല്‍ പ്രായം ഉയര്‍ത്തുന്നതിലൂടെ പരിചയ സമ്പന്നരായ ജഡ്ജിമാരുടെ സേവനം രാഷ്ട്രത്തിന് ലഭിക്കുമെന്നും അദ്ദേഹം വ്യക്തമാക്കി.