ആലപ്പുഴ: ചെട്ടികുളങ്ങര പൈതൃകകേന്ദ്രത്തിന്റെ നേതൃത്വത്തില്‍ പനച്ചമൂട് ഉലുവത്ത്് സ്‌കൂളില്‍ സംഘടിപ്പിച്ചിരിക്കുന്ന ചെട്ടികുളങ്ങര പൈതൃകമേള നാളെ മുതല്‍ 23 വരെ നടക്കുമെന്ന് സംഘാടകര്‍ പത്രസമ്മേളനത്തില്‍ അറിയിച്ചു. നാളെ രാവിലെ 10ന് യു. പ്രതിഭാഹരി എംഎല്‍എ പൈതൃകമേള ഉദ്ഘാടനം ചെയ്യും. സ്വാഗതസംഘം ചെയര്‍മാന്‍ എ. മഹേന്ദ്രന്‍ അധ്യക്ഷത വഹിക്കും. പൈതൃക പ്രദര്‍ശന ഉദ്ഘാടനം ചെട്ടികുളങ്ങര ഗ്രാമപഞ്ചായത്ത് പ്രസിഡന്റ് സി. കൃഷ്ണമ്മയും വിഎസ്എസ്ഇ പ്രദര്‍ശന ഉദ്ഘാടനം മാവേലിക്കര നഗരസഭാ ചെയര്‍പേഴ്‌സണ്‍ ലീലാ അഭിലാഷും നിര്‍വഹിക്കും. മാവേലിക്കര ബ്ലോക്ക് പഞ്ചായത്ത് പ്രസിഡന്റ് കെ. രഘുപ്രസാദ് വിപണന സ്റ്റാള്‍ ഉദ്ഘാടനം നടത്തും. ഗ്രാമ ഗൃഹ ഉദ്ഘാടനം എം.കെ. രാജീവും വെബ്‌സൈറ്റ് ഉദ്ഘാടനം ഫാ. സിജോ പാണ്ടപ്പള്ളിയും നിര്‍വഹിക്കും. പ്ലാക്കുടി ഇല്ലം കൃഷ്ണന്‍ നമ്പൂതിരി, ഫാ. മാത്യു വി. തോമസ്, പ്രവീണ്‍ ഇറവങ്കര, ജേക്കബ് ഉമ്മന്‍ തുടങ്ങിയവര്‍ സംസാരിക്കും. വൈകുന്നേരം 4.30ന് കെ.സി. വേണുഗോപാല്‍ എംപി പൈതൃകോത്സവ ഉദ്ഘാടനം നിര്‍വഹിക്കും. ആര്‍. രാജേഷ് എംഎല്‍എ അധ്യക്ഷത വഹിക്കും. കടമ്മനിട്ട വാസുദേവ പിള്ള മുഖ്യ അതിഥിയായിരിക്കും. കാക്കാരിശി നാടകം, ചവിട്ടുനാടകം, തീയാട്ട്, പുള്ളുവന്‍പാട്ട്, യക്ഷഗാന ബൊമ്മയാട്ടം, തോല്‍പാവക്കൂത്ത്, നാടന്‍ പാട്ട് തുടങ്ങിയ കലാപരിപാടികള്‍ പൈതൃകമേള ഭാഗമായി നടക്കും. 23ന് വൈകുന്നേരം നാലിന് നടക്കുന്ന സമാപന സമ്മേളനം ജില്ലാ കളക്ടര്‍ വീണ എന്‍. മാധവന്‍ ഉദ്ഘാടനം ചെയ്യും. ആലപ്പുഴ ജില്ലാ പഞ്ചായത്ത് പ്രസിഡന്റ് ദലീമാ ജോജോ, കേരള നാടന്‍ കലാ അക്കാദമി ചെയര്‍മാന്‍ സി.ജെ. കുട്ടപ്പന്‍, ഡോ. ജയരാജ് എന്നിവര്‍ മുഖ്യാതിഥികളായിരിക്കുമെന്ന് സ്വാഗതസംഘം ജനറല്‍ കണ്‍വീനര്‍ ജേക്കബ് ഉമ്മന്‍ രാജന്‍ ചെക്കളില്‍, രാജേഷ് ഉണ്ണിച്ചേത്ത്, പ്രഫ. മധു സൂദനന്‍, അനില്‍ വാത്തിക്കുളം, ഗോപന്‍ ഗോകുലം എന്നിവര്‍ പരിപാടികള്‍ വിശദീകരിച്ചു.