ഷോപിയാന്‍(ജമ്മു കശ്മീര്‍): ഷോപിയാനില്‍ തട്ടിക്കൊണ്ടു പോയ മൂന്ന് പൊലിസുകാരെ ഭീകരര്‍ കൊന്നു. വ്യാഴാഴ്ച രാത്രിയാണ് ഇവരെ തട്ടിക്കൊണ്ടു പോയത്. വെള്ളിയാഴ്ച രാവിലെ വെടിയേറ്റ കൊല്ലപ്പെട്ട നിലയില്‍ ഇവരുടെ മൃതദേഹങ്ങള്‍ കണ്ടെത്തുകയായിരുന്നു.

വീടുകളില്‍ അതിക്രമിച്ചു കയറിയാണ് സംഘം ഇവരെ തട്ടിക്കൊണ്ടു പോയത്. നാലു പേരെയാണ് ഇവര്‍ പിടികൂടിയിരുന്നത്. ഒരാളെ നാട്ടുകാര്‍ രക്ഷിക്കുകയായിരുന്നു.

കഴിഞ്ഞ ദിവസം ജോലിയില്‍ നിന്ന് രാജി വെക്കണമെന്നും ഇല്ലെങ്കില്‍ തട്ടിക്കൊണ്ടു പോവുമെന്നും ഭീകരര്‍ പൊലിസുകാരെ ഭീഷണിപ്പെടുത്തിയിരുന്നു.

മൂന്നാഴ്ച മുമ്പ് മൂന്നു പൊലിസുകാരേയും എട്ട് കുടുംബാംഗങ്ങളേയും ഭീകരര്‍ തട്ടിക്കൊണ്ടു പൊയിരുന്നു. സൈനികത്തടവിലായിരുന്ന തങ്ങളുടെ കുടുംബാംഗങ്ങളെ വിട്ടയച്ച ശേഷമാണ് ഭീകരര്‍ ഇവരെ മോചിപ്പിച്ചത്. കഴിഞ്ഞ ദിവസം ഒരു സൈനികന്‍ ഭീകരാക്രമണത്തില്‍ കൊല്ലപ്പെടുകയും ചെയ്തിരുന്നു.