കോട്ടയം: രാജ്യത്തെ മികച്ച സര്‍ക്കാര്‍ സര്‍വകലാശാലകളെ കണ്ടെത്താന്‍ ഇന്ത്യാ ടുഡേ-എം.ഡി.ആര്‍.എ നടത്തിയ റാങ്കിങ്ങില്‍ മഹാത്മാഗാന്ധി സര്‍വകലാശാല ആറാം സ്ഥാനത്തേക്ക് ഉയര്‍ന്നതായി വൈസ് ചാന്‍സലര്‍ പ്രൊഫ.സാബു തോമസ് പറഞ്ഞു.
2018ല്‍ പതിനൊന്നാം സ്ഥാനത്തായിരുന്നു. കഴിഞ്ഞ മൂന്ന് വര്‍ഷത്തിനുള്ളില്‍ ഏറ്റവുമധികം പേറ്റന്റുകള്‍ ഫയല്‍ ചെയ്ത സര്‍വകലാശാലകളുടെ പട്ടികയില്‍ എം.ജി അഞ്ചാംസ്ഥാനത്തെത്തി.
അക്കാദമിക ഗവേഷണ മികവിന്റെ പോയിന്റ് നിലയില്‍ രണ്ടാംസ്ഥാനമാണ് എം.ജിക്ക്. ഡല്‍ഹി ജവഹര്‍ലാല്‍ നെഹ്‌റു സര്‍വകലാശാലയാണ് ഒന്നാംസ്ഥാനത്ത്.
മികച്ച സര്‍ക്കാര്‍ സര്‍വകലാശാലകളില്‍ ഡല്‍ഹി ജവഹര്‍ലാല്‍ നെഹ്‌റു സര്‍വകലാശാലയാണ് ഒന്നാംസ്ഥാനത്ത്. കുസാറ്റ് ഒന്‍പതാംസ്ഥാനത്തെത്തി. കേന്ദ്ര മാനവ വിഭവശേഷി മന്ത്രാലയത്തിന്റെ നാഷനല്‍ ഇന്‍സ്റ്റിറ്റിയൂഷനല്‍ റാങ്കിങ് ഫ്രെയിം വര്‍ക്കില്‍ 34ാം സ്ഥാനത്തുനിന്ന് ഈ വര്‍ഷം 30-ാം സ്ഥാനത്തേക്ക് എം.ജി ഉയര്‍ന്നിരുന്നു. സംസ്ഥാനത്തെ മികച്ച സര്‍വകലാശാലക്ക് ഗവര്‍ണര്‍ ഏര്‍പ്പെടുത്തിയ 'ചാന്‍സലേഴ്‌സ് അവാര്‍ഡ് ' 2015-16ലും 2017-18ലും എം.ജി നേടിയിട്ടുണ്ട്.